Jesuh Zultu mithiang Pahnih

"Nannih zong lamkaltu hna le profet hna nih a hram an rak bunhmi cung i sakmi inn nan si ve cang i a kil lung cu Khrih Jesuh kha a si. Inn cu a ningpi in i ṭhen liangluang loin hmunkhat ah a dirtertu cu amah kha a si i Bawipa biakinn tling ah a chuahcanhtu cu amah ṭhiamṭhiam kha a si. Amah he nan i pehtlaihnak thawngin nannih zong hawi dang vialte he, Pathian nih a Thlarau in a umhnawhmi inn ah ser nan si cang.” (Eph 2:20-22)

Mithiang Simon le Jude konglam he pehtlai in kan Bible cathiang chungah hmun tampi ah hmuh khawh an si lo. Sihmanhsehlaw a fiang ngai ko mi cu, hi zultu hna zong hi Jesuh nih a thimmi hna an si bantukin Bupi hramthawh ka tein Bawipa caah an nunnak pek in thawngṭhabia a phuangmi hna an si timi kha a si.  

October 28 ni cu mithiang Simon le Jude hna i puai ni a si. Nihin ni caah Bupi nih a kan thimpiak mi thawngṭhabia kan relmi zong hi Jesuh nih a hnu zultu hna a thim hna nak kong a si. Jesuh nih a zultu hna a thim hna hlaan ah Pa Pathian sinah zan khuadei thla a cam. Jesuh nih a biapi mi rian a thawk hlaan ah thlacam nak in a thawk hmasa timi kan hmuh khawh. “Khua a dei tikah a zultu kha a kawh hna i hleihnih a thim hna i lamkaltu tiah a ti hna” (Lk 6:13). Khrihfa kan si ko, cun biakinn ah a kal lengmang mi zong kan si ko men lai. “Zultu hleihnih hna min na thei maw” tiah rak kan hal hna sehlaw “Ka theih” tiah kan let kho hna hnga maw? Jesuh zultu hleihnih hna min cu nangmah tein (Lk 6: 14-16) chungah khan vun zoh te ko hna.

Jesuh nih a hnu zultu tiah hleihnih hna a rak thim hna tikah hin Jesuh hnu zulh in a cawnpiak nak a rak ngai tu a dang zultu hna tampi zong an um ve ko lai. An upat tukmi le an i bochan tukmi Jesuh nih zultu hleihnih hna lawng a rak thim hna tikah a dang thim a si lomi hna hi teh zeitin dah an rak um hnga? An nih hna nih hin teh zultu hleihnih hna cungah nahchuahnak an rak ngei hna hnga maw? Jesuh tuahser nak cungah teh an lung a si cio ko hnga maw? A lung rawk mi teh an um hnga maw? ‘Kanmah nak in tlamtlin lonak tam deuh a ngei mi an si, zei ruangah dah kanmah thim loin anmah lawng a thim hna hnga’ tiin a ruatmi zong an um men lai. 

Kannih hna hi teh kha caan lio te ah khan rak um ve hna u sihlaw zei tin dah kan si ve hna hnga? Khrihfa kan si a si ahcun Jesuh nih a hnu zulh dingin a thimmi ka si ko hna. Tuahsernak in siseh, chimphuannak in siseh, Jesuh thawngṭhabia phuan ding ṭuanvo a ngei mi lawng te kan si. 

Mah le mah bia halnak cheukhat tuah hmanh hnu u sih. “Khrihfa ka sinak ah hin zei bantuk phun in dah Jesuh thawngṭhabia ka phuan ve? Jesuh thawngṭhabia teh ka phuang bal taktak ve cang maw? Nifatin ka tonmi midang hna sinah teh Bawipa Jesuh dawtnak kha ka langhter kho cang maw? Ka tuahser nak in le ka chim relnak hna zoh in midang hna nih Khrihfa ka si an ka thei kho cang maw? Jesuh hnu zul ka si an ka thei kho taktak cang maw?”