Jn 17:11-19

Ram uk bawi hna nih an ram a him nak hnga ding caah ram kil vengtu ralkap an i chiah hna. Cu ralkap hna zong nih hruaitu hna he lungthin khat, ruahnak aa khah lawngah an i timh mi thil(rian) ah teinak an hmuh khawh lai. Ram uk tu hna a do tu hna zong nih tinh mi an ngeih ve caah, an i tinh mi rian an ttuan khawh, an phanh khawh ve nak hnga ding caah phu an i ser ve hna i ral an do ve.

Kan nih minung hna zong vawlei cungah hrin kan si ko. Sihmanhsehlaw Bawipa nih a kan ser hnawh chan mi cu vancung ram ah amah he zungzal nun nuamh nak hmuh awk ah a si. Bawipa nih: “Kei cu hi vawlei ta ka si lo bantukin annih zong hi vawlei ta an si lo caah na bia kha ka chimh hna i vawlei nih cun a huat hna”(Jn 17:14) tiah a ti. A kan hruaitu cu Bawipa Jesuh hi a si. A cungah zumhnak kan ngeih ve caah a thawngttha kan cohlaan hna i a kan tinh piak mi vanram co khawh nak hnga ding caah kan i zuam cio hna. Ral kan tu cio hna.

Bawipa rian thiang a ttuan mi mithiang vialte hna zong nih an nunnak pek ngamh tiang in Bawipa nawl bia an ngai hna, an zul hna i thawngttha bia an chim cio hna. Do tu satan ral an tu cio hna. Hriamnam caah “dawtnak, toidornak, lungsaunak, ngaihthiamnak, tbk,. ” an i tlaih cio hna i a kan hua tu ral cu kan do cio hna.

Cu a si caah, kan theih cio hnga ding mi cu Bawipa nih a kan tlanh cang, a mi ah a kan ser cang bangin do tu satan ral kan tuk cio hna lio ah  Bawipa duh mi a mah he lungthin khat sinak (Jn 17:11), a nawl bia in ral do cio hna u sih. A kan huppheng tu le himnak a kan pe tu cu Bawipa a si ko.

Add new comment

2 + 11 =