Ka pekmi hna changreu cu ka sa hi a si (Jn 6:51)

John 6:51-58

Nihin ni cu kan nu Bupi nih Bawipa a Thi-sa puai a kan tuah piak. Hi puai pi bupi nih a kan tuah piak ko nain tu lio covid-19 zawtnak ruangah phumh khawh lo le Bawipa Thi-sa hlam kho loin caan sau ngai zomg kan um cang hna. Sihmahsehlaw, zumtu hna he nihin ni i puai kan tuah lio caan ah thazang lak ti ka duh mi cu zeiruangah dah bupi chungah kan rak um hna ti hi a si.

A si ah cun, bupi a lubik le kan zumhnak i a muru a si mi cu a ho dah a si hnga? Jesuh Khrih lawnglawng hi kan lubik le kan zumhnak muru bik cu a si ko. Bawipa nih nan sin ah caan dongh tiang in kan um pi hna lai a timi hi tah zei ti phun in dah a kan um pi hna hnga? Amah Thi-sa (Euchrist) Sacrament thiamthiam in a si ko.

Covid-19 zawtnak a um hlaan ah biakinn chung kan luh fatin ti thiang chiahnak ah kan kut kan hnim hna i vailamtah hmelchunhnak kan tuah. Cu cu Thumkomh Pathian Pa le Fapa le Thiang Thlarau min in tipil kan rak inn lio caan kha a thar in kan tuah tthan hna a si. Biakinn chung chiah mi Bawipa Thi-sa hmai ah kan khuk kan i bil, dawtnak he upat nak kan pek hnu ah dai tein hmun kan i laak hna i thlacam buin Bawipa Jesuh hrimhrim nih tuah dingin a kan fial mi Amah (Thi le sa) Missa thawinak tuahnak ah le Bawipa Thi-sa cohlan awk ah kan i tim cio hna. Vancung mi vialte hna he kan Bawipa sinah “A thiang, a thiang, a thiang” tiin hla kan sa tti hna i Bawipa cu kan conglawmh cio hna.

Nihin ni i puai kan tuah hnawh bik mi bupi lubik le kan zumnak muru a si mi Bawipa Thi-sa puai a si bantukin, Bawipa Thi-sa a cohlang mi pakhat cio i puai kan tuah ni a si ti zongin kan ti khawh. Zeicah kan ti a si ah cun minung cu kan ei mi bangin kan si tiah an ti bangin Bawipa Thi-sa a cohlang mi hna zong Bawipa bangin kan si ve caah a si. Kan cohlaan mi Bawipa Thi-sa cu kan thi-sa ah aa can ve caah a si. Bawipa nih Thluachuah in pe ko hna seh.

“Ka pekmi hna changreu cu ka sa hi a si, cucu zeicahdah ka pek hna ti ahcun, vawlei hi a nun nakhnga caah a si” (Jn6:51). “Hi changreu a eimi cu zungzal an nung lai” (Jn 6:58).