A kan Dawtu Bawipa

Luke 11:5-13

• Bawipa nih hal u law pek nan si lai, king u law inn ka hunh nan si lai, kawl u law nan hmuh lai tiin a kan ti tik ah zei dah kan hal lai, zei dah kan kawl lai i zeibantuk innka dah kan kingh lai ti mi hi kan i fian hna a hau.
• Bawipa cu a ttha tuk mi a si, kan herh mi vialte a kan petu a si kan ti tik ah zeitin dah hal lo in cun a kan pek lai? Kan caah kan herh mi vialte a kan tuah piak dih lai tiah kan ruah sual a si ah cun, Bawipa Pathian a duh ning he aa ralchan mi nun zia in a nung mi kan si sual lai.
• Pathian cu kan Pa le kan Siangpahrang a si timi hi theih zungzal awk a si. Amah cu zeizong vialte sertu le Bawibik a si ti zong kan theih ding a herh fawn.
• Kan khing rih nak vialte a kan tuah piak tu ding le har kan ton caan paoh ah a ka bawm chantu ding lawngin kan ruah sual a si ah cun Pathian kha kan Bawi le Siangpahrang sining in a chia kho tu kan si lo. Sal pakhat sining lawng in a chia tu kan si ko lai.
• “Bawipa, ka duh mi le ka herh mi vialte cu na theih dih cia cang mi a si caah rak ka pe ko, ka tuah piak ko” kan ti a si ah cun kan mah le kan mah bawi sining ah aa chia i Pathian kha sal sining ah a chia tu kan si ko lai. Cu bantuk thinlung put zong cu mah le mah ruam kai ternak a si caah Pathian duh ning he aa pial kalh mi a si. Pathian duh ning a zul lo mi kan si. Pathian a si kha kan philh a si.
• Ka duh herh mi ah Pathian nih ka thlacam nak a ka theih piak lo. Ka thin a hungtuk, a hal zong ka hal ti lai lo kan ti sual a si ah cun – Isaiah 37:28-29 “Asinain nangmah kong cu a dihlak in ka hngalh dih; zei na tuah le khuazei i na kal kha ka hngalh dih. Zeitluk in dah ka cung i na thin a hun kha ka hngalh. Cu bantukin na thin a hun le naa porhlawt kha ka theih i cucaah cun atu cu na hnar in sio in kan sio lai na ka ah chak kan hlomh lai; cun na ratnak lam te khan kan kirter tthan lai,” a ti” bang khan Pathian nih a kan hlawt ve sual lai, a kan ti ve sual lai.
• Pathian cu a siang mi le a kan daw zungzal tu a si cu a hmaan tak tak mi a si ko. Kan mah tthat nak ding caah zeizong vialte pek a kan duh tu zong a si ko. Sihmanhsehlaw, Amah cu Pathian a si caah kan upat, kan biak le Amah sinah lunglawmh bia kan chim zungzal ding cu a herh ve.
• Bawipa nih rak ka hal u law tiin a kan ti tik ah kan theih hnga ding mi cu, kan hal tik ah hin Amah he kan i chawnh a si, i chawnh le biachim tti nak in thawngin Pathian he i naih deuh le i theih nak ah thazang a tthawn ter. Bia tam deuh kan chim tti a si cun tam deuh kan i thei hngal i tam deuh theih hngalh nak nih pakhat le pakhat kar lak ah dawtnak a lianh ter chin.
• Dawtnak a tam deuh paoh ah sian nak lungthin a tthang chin i, cu sian nak lungthin nih kan duh herh mi co khawh nak thil a chuah ter.
• A sin i bia kan chim bal lo, thla kan cam bal lo a si ah cun zeitin dah kan duh mi le kan herh tak mi hna cu a kan pek lai. Bawipa nih freedom a kan pek mi cu thim khawh nak co vo hi a si. “Cun” timi freedom hi a si. Ka bia nan ngaih ah cun, nan ka hal ah cun, nan tuah ah cun, Thluachuak nan hmu lai, nan him lai, teinak nan hmu lai, khua ong nan tong lai. Nan tuah lo cun, nan zulh lo cun, nan ka biak lo cun; nan thi lai, nan sung lai, hloh nan si lai tiin ral rin nak a kan pek.
• Cu a si caah dawt mi u le nau hna a kan dawtu Pathian cu kan dawt ve awk asi, a bia kan ngaih awk a si i a nawl zong kan zulh awk a si.
•  
• Vancung pennak innka pi cu a kawl duh lo mi, khoi ka bantuk hmun ah dah a um ti zong hal duh lo in a um sawh i a kawl duh lo mi, innka zong a king duh lo mi hna caah cun pek a si lo, hmuh khawh zong a si lo i co khawh zong a si lo.
• Cu a si caah, Bawipa nih a kan fial bang in: “Kawl zungzal hna u sih, hal zungzal hna u sih law, a innka kha king zungzal hna u sih.”
• Nan dih lak cungah Pathian nih thluachuah in pe zungzal ko hna seh.