Kan hngal ve hnga maw?

Nihin kan relmi Bible thiang hna chungah prophet Elijah kong he pehtlai in abikin langhter a si kan hmuh khawh. Sirah 48:1-4, 9-11 chungah Elijah a liannganhnak  thangṭhat a si nak kha kan hmuh. Elijah ka chungin a chuakmi bia hna cu meizik bangin an si tiah a ti. Zeitlukindah hmual an ngeih tiah cun vancung in mei hmanh a auh khawh tiah a ti. 

Thawngṭhabia thiang (Matthai 17:9a, 10-13) chungah zultu hna nih Jesuh bia an halnak kan hmuh. Zultu pawl nih cun Jesuh cu, “Zeicahdah Phungbia cawnpiaktu saya pawl nih, Elijah cu a rat hmasa awk a si, an ti?” tiah an hal. Elijah cu a ra taktak ṭhan te hnga maw timi a si ko. Jesuh nih a leh mi hna cu, “Elijah cu a ra hmasa taktak i zeizong vialte kha timhtuah hram a thawk taktak. Sihmanhsehlaw hihi kan chimh hna: Elijah cu a ra ko cang, sihmanhsehlaw mi nih an hngal lo i an duhduh in an tuah. Cu bantuk ṭhiamṭhiam in Mi Fapa zong hi an ka serhsat ve lai,” tiah a ti hna.

Jesuh nih zeibantuk bia dah a kan chimh ve timi hi a zeimaw caan ah cun kan hngal kho dih ve lo. Theih a har tuk mi a si ko men lai, asiloah theih a fawi tuk mi te zong a si ko men lai. Zei kan rel le rello tu kha a si ko. Vawlei thilri le chawva cung lawngah kan lung kan chiah a si ah cun kan hngal kho taktak lai lo, kan thei kho taktak lai lo. 

“Jesuh nih zeibantuk bia dah nihin ni ah hin thei hna seh ti a kan duh” tiin mah le mah i hal hna u si, kan lungthin i dap hna u sih law ralrinnak i pe hna u si. “Elijah cu a ra ko cang, sihmanhsehlaw mi nih an hngal lo i an duhduh in an tuah,” tiah Jesuh nih a ti bangin Jesuh Khrih zong hi vawlei cungah hin a rak ra taktak cang ko. Sihmanhsehlaw Pathian Fapa, khamhtu Messiah a si kha an rak hngal lo. 

Nihin ni ah Jesuh kan sin rak ra ṭhan sehlaw kan hnga kho ve hnga maw?