A kan Hngalh ko

“Ka thimmi cu ka hngalh ko hna.” (Jn 13:18)

Jesuh Khrih cu kan sining vialte a thei dih tu a si. Kan nih hna zong Khrihfa kan hun si hnu lawngin Jesuh Khrih cawnpiak nak le a kong a theimi kan si. Amah cu kan Pathian a si tiah kan cohlaan i a kan cawnpiak nak hna kha a zulmi kan si.

Jesuh Khrih kan cohlaan mi zong hi amah nih a kan thimmi kan si caah a si. Kan sining vialte a theih dih cia caah a kan thimmi kan si. Zeitluk hmanh in thazaang dernak hna he a nung mi si ko hna hmanh u sih law amah caah thimmi kan sinak ah hin kan caah Pathian nih tinhmi a ngeih caah a si. Jesuh nih kan caah a kan tinhpiak mi le a kan chimh duh mi kan theih khawh nak hnga ding caah nifa tein Bible cathiang kan rel a hau. A kan chimh duh mi kan theihthiam i kan cohlaan khawh nak hnga ding caah tangdornak lungthin kan ngeih a herh.

Chambaunak phuntling he a nung mi minung si ko hna hmanh u sih law tling cikcek in a kan dawtu Jesuh Khrih nih caantha a kan serpiak zungzal ko. Nikhat kan nun khawh rih mi hi timhtuahnak tha kan ngeih khawhnak hnga ding caah a si. Sual ngaihchihnak lungthin he a sin kan panh than ding kha a kan duh piak zungzal mi a si ko.

Caan tha an pe zungzal tu Jesuh Khrih kha na cohlaang lai maw, na hlawt lai dah? Ruat!

Add new comment

12 + 8 =