Kan i cawn ve dingmi

Photo Credit

Nazareth khua cu sertu Pathian nih sermi minung hna bangin a rak thannak le a rak tlawn lennak khua a rak si. Cu khua ah cun zeizong vialte a ti kho tu le a tuah khotu Pathian, a thazang a dermi ngakchia bantukin a rak thannak khua a si. Cu khua ah cun zeizong vialte a ngei dih tu Pathian, rumra le chawva a ngei lomi bantukin a rak thannak khua a si. Pathian nih minung hna tonmi harsatnak, sifahnak, cawhdehnak, ngaihchiatnak, hlawtnak le thihnak, tbk . . . vialte kanmah khamhnak ding caah a rak intuar ve.

Pathian nih minung hna khamhnak ding caah mifim, cathiam hna an umnak hmun, siangpahrang hna le bawi hna sin a um mi hna kha rak thim hna loin; mi nih theih hngalh tuk lomi, tangdornak lungthin a ngeimi ngaknu thiang Mary kha a rak thim. Pathian nih cun kan reng tlaihmi siseh, kan ngeihchiah chawva in siseh, rumra ngeihnak le min thannak hna kha zoh loin minung lungthin tu kha a zoh zungzal tu a si(1 Samuel 16:7).

Mary kong he pehtlai in tangdornak lungthin kong kan chim tikah thuk deuh in ruat ve hmanh. Biatak tangdornak lungthin ngeih kan ti mi ah hin ralthatnak ngeih a herh. Mary nih hi bantuk ralthatnak hi aa ngeih. Pathian vancungmi hmanh kha “Ngaknu thiang ka si tung, zeitindah hihi a si khawh lai?”(Lk 1: 34) tiah a ti. Sihmanhsehlaw Pathian nih a cungah timhnak a ngeih cia mi kha hlaw loin a rak cohlaan.

Biatak zumhnak kan timi ah hin midang chimmi paoh khi “Elaw” ti a si lo. Zumhnak timi cu Pathian duhnak zeidah a si timi theih in Pathian duhnak tuah le zulh kha a si(Lk 1:35-37). Zeicah tiah cun Pathian cu a kan sertu le kanmah nak in zeizong vialte a thei deuh zungzal tu a si caah a si. Cu ruangah Mary nih: “Kei cu Bawipa salnu ka si ko, na chim bang cun ka cungah si ko seh”(Lk 1:38) tiin Pathian thlahmi vancungmi kha a rak leh.

Kanmah nih kan duhduh in Pathian program kha thlen ding a si lo; a tlintertu si dingin kan i zuam ding tu a si. “Vancung ah na duhnak an tuah bangin Vawlei cungah hin tuah si ve ko seh (Matt 6:10). “Keimah nawl si loin nangmah nawl si ko seh”(Lk 22:44).

Add new comment

2 + 1 =