Kan i ruahchannak cu Thihnak teitu Bawipa cung lawngah a si!

Thawhthan caan lio ah ruak a um ti lo mi thlaan kan hmuh; cu bantukin tu lio caan ah Bawipa Jesuh zumtu Khrihfa hna hmun khat te ah i pumh ti khawh ti lonak Biakinn le hmunhma hna ah an i cang hna. Sihmanhsehlaw, Bawipa zumtu Khrihfa hna nih nihin ni tiang online chung i pumh ti nak in kan zumhnak ah fek tein kan um cio hna. Online in thlacam ti nak caan hna zong nih hin biakinn chungin thla kan rak cam ning cang hna kha phundang-a thar in nunnak a pek than ti zong kan ti khawh. Hi bantuk Covid-19 zawtnak caan lio Biakinn hna ah Thawhthan puai ni sunglawi kan tuah kho hna lo. Sihmahsehlaw, Bawipa Thawhthan nak "Paschal Mystery" timi Thawhthan puai pi cu online in kan i tel cio khawh hna zong hi thluachuah nganpi a si ko.

Kan i pumh hna nak biakinn hna cu midam mi hna caah cun lawng hmanhsehlaw, zawtnak a tong lio mi si hna seh, nikhat riantuan i nikhat a paw aa cawm mi hna caah taksa lei in himnak a pe than tu biakinn ah an cang tthan ko hna. Kan biakinn hna cu har a tong lio mi hna caah i dornak hmun ah an cang tthan ko hna. "An mah lak i a nauta bik hmanh kha ti kik hrai khat a pe mi cu, laksawng kha a hmu hrimhrim lai" (Matt 10:42) tiah kan Bawipa Jesuh Khrih nih a kan cawnpiak mi kha philh hna hlah usih. Bawipa cu thlaan chungin a thawh tthan hnu ah a zultu hna sinah voi tampi a lang. An ngeih chiat lio, an khuaruahhar lio, tihphang in an um lio caan ah Bawipa cu an sin ah a um zungzal ko.

Bupi hruaitu hna nih ram uk bawi hna he i bawm in hi bantuk chawnhkawh a fawi ngaimi zawtnak ral an doh lio ah thlacam nak in kan nih zumtu vialte hna zong nih bawm cio hna u sih. Biakinn ah kan i pum kho hna lo. Sihmahsehlaw, hartong mi hna sinah kal in rian tuan tu phu vialte hna caah thlacam bawm hna u sih. Thlacam nak in kan nih hna zong an riantuan nak ah i tel ve cio hna u sih.

Thlaan chungin nunnak a kan hmuh piak tthan tu kan Bawipa Jesuh Khrih cungah zumhfek tein thlacam zungzal hna u sih. Bawipa Jesuh Khrih cu zeizong vialte a kan tei piak tu a si. "Cun hihi philh hlah u: nan sinah a zungzal in, caan dongh tiangin ka um lai" (Matt 28:20) tiah a ti.