Kan nun hi zeidah a si?

“Hi fa hi zei ko dah a can te lai? tiah an ti cio. Zeicahtiah Bawipa tthawnnak cu a cung i a um kha a fiang ko.” (Lk 1: 66)

Hi vawlei cungah minung pakhat hrin a sining le a hun phanh ning hi khuaruahhar ngai a si mi thil a si. Minung pakhat hrin a si tik zongah, hrin a sining zong hi a lak a si hrimhrim lo. Tinh mi pakhat khat cu a um zungzal. Nu le pa chungkhar sahlawh cingla rualchan hna le innpa chakthlang hna zong nih hrin a si cang mi ngakchia kha ttha tein zohkhenh ding a si. Minung pakhat a hung si mi ngakchia zong a hun tthan tikah amah le amah mitha pakhat si dingin i sersiam ding a hau ve.

Kan nunning hi kan i zoh tikah minung pakhat sining lawng siloin, Khrihfa pakhat sining in Pathian nih a kan thim mi kan si. Cu a si caah Pathian tthawnnak le kilven nak cu tipil petu Johan bangin kan sinah a um zungzal (Lk 1:66).

Cu a si caah zeibantuk tukforhnak hmanh tong hmanh u sih law, Johan bangin kan lungthin der ter loin Pathian i bochan in kan tthawn zungzal ding a si. Hi vawlei cung kan nunnak sullam cu Pathian nih a rianthiang caah hman a kan duh caah a si. A lak in a kan chia hrimhrim lo. Prophet Isaiah nih: “Ka chuah hlan in Bawipa nih a ka thim i a sal si awkah a ka fial”(Is 49:1) tiah a ti bangin kan nih pakhat cio hna zong hi rianfial ding caah thimmi kan si cio hna.

Pathian nih a kan fial mi rian a thei thiam i a ttuan kho tu kan si khawh zungzal nak hnga ding caah a kan thim tu le rian a kan fial tu Pathian sinah thazang thluachuah hal zung zal hna u sih. Bawipa nih a kan tinh piak mi rian zong hmuh thiam i zuam hna u sih.