Kan nunnak ah…

Minung cu bia a chim mi kan si caah thawngpang hi theih a fawi i tthatnak tuah nak in a min a thang mi hna zong theih khawh colh an si bantukin chiatnak a tuah tu hna thawngpang zong theih a fawi.

Jesuh nih thawngttha bia a chimnak siseh, khuaruahhar thil a tuah mi hna siseh, mizaw le thinghmui mi hna a damter hna timi thawngpang cu pawngkap khuazakip nih rak theihmi a rak si. Sihmanhsehlaw kan Bawipa Jesuh Khrih le a zultu hna cu Samaria khuami hna nih a rak cohlaang duh hna lo(Lk :51-56). “Hi tluk a min a thang mi kan Bawipa a cohlaang duh lo mi hna khua hi duah dih ding a si” ti tiang in James le Johan nih Jesuh sinah an rak chimh. Bawipa tu nih cun lehrulh hna loin khua dang lei in Jerusalem lei ah a kal timi kan hmuh khawh.

Jesuh Pathian nih minung hna hi 100% a kan dawt taktak ko. Kan thlarau khamh a kan duh i kan himnak hnga ding caah a kan duh piak zungzal ko. Sihmahsehlaw, tthatnak a tuah peng tu Jesuh hmanh kha dawnkhaan tu a rak ngei zungzal.

Kan nih hna zong kan nunnak ah tthatnak kan tuah caan paoh ah siseh, tuah kan i timh caan paoh ah siseh dawnkhaan tu tete hi an um zungzal kho ve. Kan programme a hrawk tu hna zong an um kho men. Jesuh cawnpiak nak a cohlaang i a hnu zul a simi kan nih Khrihfa mi hna zong nih Bawipa nunnzia hi kan i cawn zungzal ding a si. minung sinak in cun 100% dawtnak kan ngei dih kho men lai lo. Sihmahsehlaw ngeih khawh ve ding in kan i zuam zungzal ding cu a herh ve.

Mi vialte hna cungah thleidannak lungthin ngeih loin dawtnak lungthin he Jesuh muihmai, Pathian muihmai, dawtnak muihmai langhter khawh i zuam cio ding a si.