A kan zohkhenhtu Jesuh

Kan Bawipa Jesuh Khrih vailam cungah a thih hnu cun a pawng te ah a um i a cawnpiaknak chun he zan he a thei ko mi a zultu hna zong an ngaih a chia i an lung a dong ngaingai. Hmai lei caan kong he pehtlai in an rak i timh mi hna le an rak i ruahchan mi vialte hna zong Jesuh a thih hnu cun loh hram aa thawk.

Jesuh hnu an rak zulh hlaan ah an rak tuah tawnmi ngatlaih dah ti lo cun zei tuah awk an hngalh ti lo caah zultu hna cu an rian thing kha tuan than ding in an i tim than. Nihin ka relmi cathiang (John 21:1-14) chungah Jesuh nih zultu hna sinah a rat hnawh hna i thihnak in a thawh than cang nak kha a hmuh sak hna. Jesuh nih zultu hna kha, “Ka fa le hna, zeihmanh nan tlai lo maw?”(Jn 21:5) tiah a ti hna. Kan nih pakhat cio hna zong kan ton mi harsatnak hna ruangah zultu hna bangin kan lung a rawk bal ve cio maw? Jesuh nih ka fale hna tiin a kan panh cio lengmang ko.

Cun Jesuh nih zultu hna kha ei awk a hal hna tikah amah lila nih ei awk a pek than hna. Kan Bawipa le kan Pa a simi Jesuh nih zeitikhmanh ah a kan kal tak lo. A kan um pi i taksa lei in siseh, thlarau lei in siseh kan herhmi hna kha a kan pek zungzal ko.

Zultu hna nih an thiamnak hmang in zaan khuadei sur cu an cheh lengmang ko. Sihmanhsehlaw Bawipa aa tel lo tikah an theihhngalh nak le an tuah khawhnak hna cu pakpalawng ah an cang. Bawipa nih a fial hna ning bangin zultu hna nih an tuah tikah nga 153 an tleih tiah kan hmuh. Bawipa fialmi rianthiang kan tuan a si ahcun minung ruahnak in a si kho lomi ah kan ruah mi hna zong kha an hung si kho dih ko.