Kan Zulh ding "Policy"

Ṭih ti mi ah hin thlarau lei ṭih thiam ding mi thil a si lo ah uktu a si mi hna hi ttha tein thleidan thiam in ṭih thiam kan herh. Bawipa nih ralrin a kan pek mi cu: “Pum cu a that kho ko nain thlarau a that kho lomi cu va ṭih hlah u; hell chungah pum he thlarau he a that khotu Pathian tu kha va ṭih u” (Matt 10:28) tiah a kan ti.

Pathian ṭihzah thiam nak le upat thiam nak hna nih kan thlarau caah him nak a kan ngeih ter i; tukforhnak kan in kan ton tikah thil chia-ttha thleidan thiam nak le fimnak a kan ngeih ter. A bik in thlarau lei in hlen kan ton caan ah hin Pathian Thiang Thlarau nih fimnak a kan pek. Zeicah kan ti a si ah cun Bawipa a ṭih zah mi le a upat mi nih cun a cawnpiak nak kha ttha tein an ngeih i an zulh caah a si. Psalm cathiang chungah kan hmuh mi cu: “Bawipa a ṭihmi cu a vancungmi nih khan an zoh hna i ṭihnak chungin an luatter hna” (Psl 34:7). “Ṭhat lonak kha hrial u law ṭhatnak kha tuah u; daihnak kha duh u law nan hmuh khawh nakhnga fak piin i zuam u”.(Psalm 34:14) tiin kan hmuh.

Kan nunnak ah a ka uk tu pennak hna cu phun hnih lawng an um ko.  Ṭhatnak, a hman mi le ceunak a si mi Pathian pennak le; lihchimnak, tthat lo nak tuah ding caah ah a tukforh lengmang tu le thil ttha lo tuah ding lawng ah forhfial tu Muihnak pennak (Satan pennak) hna hi an si.

Pathian pennak caah maw kan nun lai satan pennak caah ti cu kan mah tein ruah cio hna u sih.

Kan Bawipa Jesuh Khrih nih a kan cawnpiak i zulh ding caah a lam a kan hmuhsak mi Vancung pennak (Pathian pennak) a si mi daihnak le ṭhatnak maw; a si lo ah Pathian pennak he aa ral chan mi tanglei pennak (satan pennak) dah kan i thim hna lai.

Cu a si caah Bawipa nih a zultu hna a rak cawnpiak tik hna ah khan hmai lei an ton hnga ding mi thil hna zong intuar khawh nak hnga ding caah ralrin nak a rak pek hna nak cu a si. Bawipa Jesuh hnu zultu kan si ah cun amah bangin fahnak hna le nehsawhnak hna kan in ve ding hrimhrim a si. Zeicah kan ti a si ah cun Jesuh cu kan Pathian le kan Bawipa ah kan i thim cang hna i a kan cawnpiak mi hna kha zulh ding caah kan i timh cang caah a si. Cu a si caah, kan Bawipa hnu kan zulh a si ah cun a har sat nak ah kan i hrawm ve lai i a lunglawmh nak zongah kan i hrawm ve lai.

Bawipa nih a kan cawnpiak mi policy kan zulh a si ah cun Bawipa ral a si mi paoh hna i an policy cu kan zulh lo ding a si. Bawipa cawnpiak mi policy zumhtlak tein le ṭha tein zulh khawh ding le i tlaih khawh dingah i zuam cio hna u sih.

 

Add new comment

2 + 3 =