Kan Zumh ko Bawipa

Jesuh cungah zumhnak ngeih timi hi zei khi dah a si hnga? “Dawn khaantu zeitluk tam hna hmanh sehlaw, Jesuh Khrih thep loin na zoh, naa bochannak ah na lung an in pialter khawh lo le an in tei khawh lomi kha a si” tiah ti ko hna u sih. Peter nih Jesuh ti cung a kal a hmuh tikah: “Bawipa, nangmah na si taktak ahcun, na sinah ka ke in ti cungin ka raṭer tuah,” tiah a ti. Jesuh nih, “Ra ngat,” tiah a ti.

Sihmanhsehlaw Peter cu ti cungah a kal lio ah khan pawngkam a zoh i “thlitu a fah zia kha a vun hmuh tikah a thin a phang i ti chungah cun a pil cuahmah.” “Bawipa, ka khamh tuah,” tiin zumhnak le bochannak he Jesuh a auh ṭhan tikah khamh a si ṭhan. Dawtmi u le nau hna minung pakhat a si ve mi Peter lawng kha mawhchiat hna hlah u sih. Kan mah pakhat cio hna zong Peter nak hmanh in kan thazaang a der deuh kho men mi a si. Peter nih cun Bawipa a auh manh khah. Kan nih hna nih teh harsatnak chung kan tlak tak tikah Bawipa kan au kho tak ve hnga maw? Khrihfa ka si. Nawbia pahra chungum “Keimah hlei in pathian dang kha zumh in nan bia lai lo,” (Exo 20:3) timi kha kan kaa in kan chim, kan cam peng ko men lai; taksa lei in fahnak ton tikah “Kan zumh tiah na timi Jesuh” kha kal tak in, camhawih a thiammi hna sin ah na kal sual tawn maw?

Nunnak timi hi khuaruahhar awk taktak a si mi a si; minung ruahnak nih a theih dih khawh lomi zong a si. Mi cheukhat cu nihin ni caan ah hmuh le chawhbiak an si ko hna nain a thaizing ah cun kan pawngah an um ti lo. Kan thawchuah khawh rih mi cungah hin “aamahkhaan” khawhnak zeihmanh a um lo. Nunnak a kan petu nawl lawng a si. 

Cu ve bantukin Jesuh cungah zumhnak kan ngeih mi zong hi khuaruahhar awk taktak thil pakhat a si ve. Zeicah kan ti a si ah cun kan hmuh khawh lomi le kan tongh khawh lomi cungah zumhnak fek kan ngeih mi hrimhrim hi a si. Cun Pathian veel le thluachuah zong a si.

Peter nih hin Jesuh cungah zumh nak ngei hlah sehlaw ti cung in kal khawhnak nawl a hal hnga lo. Peter nih cun a zumh taktak ko. Sihmahsehlaw Jesuh Khrih kha zoh loin thil dang pi a zoh tikah ti chungah a pil nak kha a si. Thlichia le rili tilet, harsatnak hna kan ton tikah ṭih an nunnak lawng kha kan zoh, zeitindah hi bantuk harnak hi ka hrial lai ti lawng kan ruah, kan ngiat a si ah cun kan thi sual lai. Pakhat nak bikah Jesuh kha ṭhep loin kan zoh hmasat a hau. Pathian kha kan kawl hmasat a hau (Maṭ 6:33).

Jesuh nih amah aa bochanmi hna cu zeitik hmanh ah a kal tak bal hna lo. A puan kite hmanh kha zumhnak he a tawng mi hna cu damnak a pek ko hna: “Ka fanu, na zumhnak nih an damter, dai tein va kal lo,” tiah a ti (Lk 8:43-48). Zumhnak le bochannak he a mah a panh mi hna kha thlarau lei in siseh damnak a pek ko hna (Lk 7:48).

Kan nih pakhat cio hna zong Jesuh kha ṭhep loin zoh hna u sihlaw zumhnak fek he ṭhawng ngai in a hnu zul zungzal ko hna u sih.