Kawhnak

Nihin ni caah Bupi nih a kan thimpiak mi Cathiang hi phundang ngai a si (Matt 10:16-23). Jesuh nih a zultu hna kha zeitin dah an um an kal lai timi kong pehzulh in langhter than mi a si. Zultu hna nih thawngthabia an phuan tikah ralrin ding a herh mi tete hna zong aa tel: “Cenhngia hrang rual lak i thlahmi tuu bantukin kan thlah hna.” Thihnak tiangin a phakter kho tu hna lak ah thlah sinak kha a langhter.

“An in tlaih hna lai i zung ah an in chuahpi hna lai, pumhnak inn ah an in chuahpi hna lai i an in tuk hna lai. Cucaah vaa ralring u.” Sihmanhsehlaw Bawipa nih zeitin dah a hnemh hna tiah cun: “Zeicahtiah nan chimmi bia cu nanmah bia a si lai lo; nan chung i bia a chimtu nan Pa Thlarau nih an pekmi hna bia a si lai,” tiah a ti hna.

Dawtmi u le nau hna thil hmaan kan chim, kan tuah, kan dirpi ko tiah zumhfek tein kan um cio men lai. Sihmahsehlaw a caan caan ah dawnkhaantu an hung langh tikah na zumhnak kha na kal tak sual maw? Jesuh nih a ka umpi ko, thazaang a ka pek ko, a ka hnemh ko timi ruahnak na ngei kho maw? Jesuh aw cu na thei men lai lo. Sihmanhsehlaw ral thatnak, lungthin thawnnak thazaang an petu le na pawngah an umpi zungzal tu cu Jesuh a si ko.

Jesuh hnu zulh timi cu a fawi hrimhrim lo. Harsatnak tampi ton a si. Minung ruahnak nak in dawnkhaantu an tam timi cu theih cia hrimhrim ding a si. Minung hmaizah duh le thangthat upat pek duh ah kan zulh sual a si ah cun kan palh tuk sual lai.

Jesuh hnu zulh tikah ruah lomi thil tampi ton a si. Jesuh cawnpiak ningin le biatak tein kan nun kan kal a si ah cun Jesuh nih a rak ton mi hna kha kan nunnak ah kan ton ve hrimhrim cio ko hna lai. Sihmahsehlaw minung kan si caah thim ding tete cu kan ngei zungzal ko. Jesuh maw kan i thim lai, asiloah kan kal tak lai maw? Ruat!