Kebei Minu Jesuh nih a damter

Photo Credit

Lk 13:10-17

1. Kumhleiriat chung a zaw mi minu cu a keng kha a kul dih cang. Tiduhmi cu sualnak chung caan saupi kan um ah cun, sualnak sal kan cang i Sualngeihthiamnak sacrament ah i mer in Bawipa Zanriah (Missa) ah tel awk kha thazang a der tawn; nain kan biakmi Bawipa cu sualmi a dawtu Pathian, zaangfaknak he a tlingmi Pathian a si i kan sualnak ngaihthiam awk ah kan lakah a um zungzal(abikin sacraments thiang ah). “Minu, na zawtnak in na laut cang,” tiah a ti.

2. Jesuh nih mah khuaruahhar (damnak) thil tuah awkah Sabbathni (ulh ni) kha aa thim. Zeica ti ahcun Sabbathni ulhnak kong sullam kha fianghter a duh.

Israelmi nih: (1) Pa Pathian cu Sertu Pathian a si ti philhlonak (Gn 20:8-11) le (2) Egypt salsinak in an luatnak philhlonak ah Sabbath ni cu an ulh (Deut 5:12-15).

Cu bantukin, kannih Khrifa hna ca zong ah hin Zarhpi ni cu sualnak in kan luatni (nunnak thar petu ni sunglawi, thawhtthan ni) a si.  Cu caah, Sabbath/Zarhpi ni cu lautnak petu ni sunglawi a si bantukin pakhat le pakhat kan I dawhnak kha  lanhter awk ni a si ti kha lanhter duh ah Jesuh nih minu kha Sabbatih ni ah a damter.

3. Pumhnak inn zokhenhtu le mi cheukhat cu Jesuh nih Sabbath ni ah minu a damter kha a hmuh tikah a thin a hun; nain mizapi cu an i lawm, Pathian an i thangtthat. Zeidah a kan hmu sah. Zumtu khrihfa hna nih Bible cafang/Pathian nawlbia hi sullam zeidah si ti  kan theih fiang lo a si ah cun, kanmah ruahnak in Pathian a bia mi a si khawh. Nain, nawlbia lakah a ngan bik nawlbia cu Pathian kha kan lunthing dihlak le nunnak dihlak, ruahnak dihlak le thazang dihlak in daw le innpa (unau) kha mah bantukin daw kha a si. Cu si caah, biaknak ruangah pakhat le pakhat I sik, i soi le i haut ti cu a dik mi khrihfa nunzia a si lo ti kha kan hmuh. Sihmanhselaw, mizapi nih minu damnak hmuhnak cungah an i lawm bantukin aa lawmmi sinah vaa lawm pi le a ttapmi sinah va ttap ve (Rm 12:15) khrihfa nunzia thar a si.

 

 

 

 

 

 

 

Add new comment

10 + 10 =