Kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai (Matt 11:29)

Hakha khua leng Misur dum(Photo: RVA Hakha)

Bawipa Pathian nih kan caah a kan timh piak mi le a kan duh piak mi theih na duh maw? Vancung um Bawipa Pa Pathian sinah Jesuh nih lawmhnak bia a chim kan hmuh. Cu cu Bawipa nih a zultu hna sinah Amah Pathian theih khawhnak le hngalh khawhnak fimnak a pek mi hna kha a si. Bawipa thlacam nak nih Pathian konglam siseh, kan mah pakhat cio nunning konglawm siseh zeibantuk theih hngalhter nak dah a kan chimh ve cio?

Pakhat nak ah Pathian cu van le vawlei um a nung mi thil vialte hna i “Kan Pa” a si nak kong a kan chimh. Amah cu ser mi vialte hna uk tu le hramthawhnak Pa a si. Mithiang Paul nih: “Hi ruangah hin kan Pa hmaiah khuk bil in ka kun tawn, amah hi vawlei cung i khua a sami innchungkhar vialte nih an min an i laknak hram a si (Eph 3:14-15)” tiah a ti.

Bawipa nih thla a cam mi chung zongah hin kan caah ralrin nak ngeih hnga ding mi hna zong an i tel rih. Ruam kai nak ngeih lo ding hi a si. “Mah le mah ruam kai nak nih Bawipa dawtnak le Bawipa he aa pehtlai mi thil thiang hna kha hmu kho lo dingin” kan mit a kan phanhter caah a si. Ruam kai nak kan ti tik zongah hin a phun phun an um kho. Tuaktannak lei in siseh, thiamsan nak lei in siseh, mah khuaruah khawhnak lawng i bochan nak hna le, lung puarnak, lung tthawnak tbk,.. hna nih Bawipa tthatnak hna le a pennak ram hmuh khawh nak mit a kan huh khawh caah a si.

“Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo. Vawlei ta a simi thil paohpaoh — pumsa duhnak tehna, mi nih zoh an duhmi thil hna, mi nih porhlawtnak ah an hmanmi thil tehna hi Pa sinin a rami an si lo; vawlei in a rami lawngte an si dih. Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung (1 Jn 2:15-17)” tiin mithiang Johan zongnih a ti. Mithiang James zongnih a ti ve mi cu: “Pathian nih aa porhlawmi cu a doh hna i mi toi i aa dormi kha vel a ngeih hna (James 4:6)” tiin a ti ve.

 Mithiang Peter zongnih: “Cu bantuk ṭhiamṭhiam in, nannih a no deuh pawl zong nih upa deuh pawl kha an nawl nan zulh hna lai. Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih “Pathian nih milungpuam cu a doh hna i mitoidor cu a vel kha a pek hna (1 Peter 5:5)” a ti.

Baiwpa nih a kan cawnpiak mi cu: “Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si. Cun ngakchia hi bantuk pakhatkhat kha ka min in nan conglawmh hna ahcun, keimah nan ka conglawmh a si (Matt 18:4-5)” tiah a ti. Cu a si caah “toidor nak lungthin” cung lawngah Bawipa nih a vel a tthan ter khawh i kan chungah tthatnak hram a kan bunh piak khawh ko lai.

Toidor nak lungthin a ngei mi hna lawng nih Bawipa sin in a ra mi fimthiamnak le Bawipa tthatnak theih hngalh khawhnak an ngei i pakhat cio nunnak ah Bawipa nih a kan duh piak mi programme kha an theih khawh.

“Maw ka Pa, van le vawlei a uktu. A fimmi le cathiammi hna sinin na thuhmi kha cathiam lomi hna sinah na langhter caah na cungah ka lawm. Asi, ka Pa, cucu nangmah nih siseh ti na duhningte a si (Matt 11:25-26).” Cun Bawipa nih a kan sawm rih mi cu:“Kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai (Matt 11:29).”

Add new comment

12 + 2 =