Khamhtu Pekchanhnak

Photo Credit

Nihin cu Bawipa Jesuh Biakinn thiang ah an kalpi i Pa Pathian sin an pekchanhnak puai Bupi nih a kan tuah piak.

Nau ngakchia a chuah in ni 40 chungah Pathian sinah pekchanhnak le tlanh thannak tuah hi Israel miphun hna nih an tuah mi phunglam a si. Cucu Pathian nih tuah u tiah a timi hna zong a si. Jesuh anu Mary a thawhkhawh a kal khawh hnu ah a va Joseph he Jerusalem ah an kal i an phung nih tuah u tiah a timi hna bang khan thianternak le pekchanhnak kha an tuah.

Mary le Joseph Biakinn an phanh lio ah Simeon timi pa zong Biakinn ah a rak um lio a si ve. Simeon cu Israel mi hna hnemhnak an hmuh thannak caan kha Biakinn thiangin caan saupi a rak hngak lengmang mipa a si. Ngakchia Jesuh cu a nu le a pa nih, an phung nih tuah ding a si tiah a ti hna bang khan, Biakinn chungah an run luhpi tikah, Simeon nih cun a rak pom i Pathian cu a thangthat i:
"Nihin ah hin, Maw Bawipa, nangmah nih na salpa cu dai tein ka rian na ka limter cang,
Atu cu nangmah na biakamnak kha a tling cang. Zeicahtiah miphun vialte zohchih in khamhnak ding
na rak timhmi cu ka mit hrimhrim in ka hmuh cang;
Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si" tiah a ti.

Cu caan lio ah cun profet nu Anna timi zong Biakinn thiang ah cun a rak um ve. Mary, Joseph le Jesuh hna kha a hmuh hna tikah, an sinah a ra i, "Pathian nih Jerusalem cu a tlanh than lai tiah a hngakmi vialte hna sinah khan ngakchiapa kong kha a chim." Biakinn thiang chungah a ummi hna nih hi bangin Anna nih a chimmi an theih tikah zeitindah an hmuh, an ruah cio hnga? Simeon le Anna nih an chimphuan mi a thei mi hna nih an zum kho taktak hnga maw? Asiloah lunghrinh in an um hnga maw?

Simeon le Anna nih Jesuh kong he pehtlai in an chim lio caan bantuk te khan nang zong i um ter ve hmanh! Thil sining kong an chimmi hna cungah khan nang teh zeitindah na hmuh ve hnga? Na zum kho ve hnga maw, lunghrinh in na um ve hnga maw?

Vawlei cung thil umtu ning le sining hna zoh in hmailei kong he pehtlai in profet bia in a chim phuang mi tampi an rak um cio. A si tak hnga maw tiah caan saupi a hngak mi zong tampi an rak um i an rak chimphuanmi zong tlin loin a um mi zong tampi a um.

Nihin zong hi kan nunnak a donghnak ni caan a si kho mi a si. Ralring tein le Pathian cungah lunglawmhnak bia chim, thlacam buin nung hna u sih.

Add new comment

7 + 13 =