KHRIH SIANGPAHRANG PUAI

Photo Credit

 

  • Tuzarh cu (A) kum caah a donghnak zarh a si cang. Khrih Siangpa hrang puai hi 1925 kum ah Pope Pius XI nih a thawk mi a si. A sullam cu amah Khrih loin ahohmanh kan si kho lo, amah uknak tangah ahohmanh kan luat kho lo, amah thawng in kannih vialte kan nung kan cawlcaang kho, cucahcun hi puai hi tuah hrimhrim ding in a thok mi a si.
  • Jesuh a rat lainak kong hi Profet Ezekial zong nih a rak thanh chung cang. Voikhatnak Bible ah fiang tein kan hmuh khawh. Pathian nih minung a kan dawt ning hi cu khuaruahhar taktak a si ko. Asinain minung tu nih hin cun Pathian nih a kan dawt ti cu kan hngalh ko nain kannih nih cun a mah kha kan daw ti lo.
  • Khrihfa a si mi poh Pathian na daw maw tiah i hal cio u si law a ho poh nih kan dawt kan ti dih cio ko lai. Asinain kan dawtnak hi zeitluk khi dah a va si cio hnga, mah tein i tuak cio ding a si ko. Kaa lawng dawt cu a fawi tuk hringhran. Mi pakhat kan dawt ahcun a caah harnak intuar kha kan ngamh ko. Khrihfa a tamdeuh hi cu Pathian caah ti ahcun a ngamh dih mi kan lo ngai te. Asinain zarhpi ni hmanh felte in aa pum kho lo mi kan tam pah men lai. Pathian hi minung nih hitluk in kan dawt lo ko na in Pathian nih cun a mah he um `i ding ah hin a zungzal in a kan kawl ko i a kan auh zungzal ko.
  • Nihin thawng`habia kan theih mi nih hin kan lung a kan fimter awk hrimhrim a si cang. Kan nunchung kan tlawnlen lio te ah hin Pathian duhnak hi zeitindah kan tuah lai ti hi fiang tuk in a kan chimh cang. Biaceih nikhua cu kan phan hrimhrim lai va si kaw,Tuu le Meheh bang `hen kan si lai caan a phak tikah Tuu sin ah maw kan kal te hnga Meheh sin ah dek kan kal te hnga. Duhmi sin poh ah kal khawh a si ko. Nangmah kha nawl ngeitu cu na si. Zalong tein thimnak caan a kan pek ko.
  • Pathian duhnak tuah kha kan duhnak nganbik ah a chia kho mi kan si nak hnga a biapi tuk hringhran. Pathian nih a kan duh piakmi khrihfa sining kha kan bupi chungah langhter kho hna usi. Dawtnak le daihnak kha. Jesuh nih a kan hngahnak hmunah khin zumhtlak sinak nih khan kan namchih hram ko seh. Khrih Siangpahrang a sinak hi a tu kan nunchung hrimhrim ah hin kan langhter khawh a hau. Culo cun zungzal kan nunnak hmun cu `ihnung tuksum a si ko lai.

Add new comment

1 + 13 =