KHRIH SIANGPAHRANG PUAI NI

Photo Credit

Voikhatnak Bible - 2Samual5:1-3
Psalm - 122:1-5 (Lehnak 122:1) 

Voihnihnak Bible - Kolos1:12-20
Thawngṭhabia- Luke 23:35-43 

 RUAH DING TETE

1. Thawngṭha pali chung kan zoh ahcun zaangfah dawtnak kong tam deuh kan hmuh khawh. Matthew chungah mi bupi rawl ṭaammi thongnga kha nga le changreu a danghnak hna, Mark chungah cun midam lo pawl a zohkhenhnak hna, John chungah cun vawlei cung pumpi huap in zaangfah dawtnak a ngeihnak kong, a si nain Luke chung ahcun an zapi chungin dawtnak le zaangfahnak kong a bik in a ṭial kha kan hmuh khawh. 

2. Luke chungah cun mizaw pawl zaangfahnak lawng si lo in a tlaumi
tuu kong, a tlaumi phaisa, Samariṭan miṭha kong le fapa tlau kong hmuhkhawh a si rih. 

3. Nihin thawngṭha bia chung zongah aa ngaichihmi mifirpa kong kan hmuh rih, vailam ah tahṭimi mifirpa nih zeiruangah Jesuh lei ṭanh in bia a chim hnga? ruah awk tampi a um. Mah mifir pa nih hin Jesuh chim mi "Ka pa ngaithiam ko hna zei kan tuah ti an hngal lo" a ti mi a theih caah maw a si hnga? Jesuh kong hi hlaanpi in a rak theih cang caah a si hnga maw? Johan le Nu Mary pakhat le pakhat i bawmh ding in Jesuh chimmi a theih caah a si hnga maw? ... a si khomi thil pakhat cu Jesuh nih a intuar mi sifah temhnak hi amah bak nih a hmuh ca zongah a si kho men. Adang misual vialte nih Jesuh cu sersat zomhtaih in heh tiah an ti lioah anih nih cun "Nang le kei cu kan sualnak ruangah kan in, a si nain anih cu sualnak pakhat hmanh a ngei lo" tiah a hawi mifirpa kha a mawhchiat. Cu lengah a chim rihmi cu Jesuh kha "Na pennak chung na luh tikah rak ka philh te hlah" tiah bia a cah rih. Hi mifirpa bia hi Jesuh caah cun lunglawmhnak le thazaang ṭhangai a rak si caah Jesuh nih "Nihin keimah he Paradizu ah na um lai" tiah bia a kamh colh. 

4. Vailamtah a tuar vemi hi mifirpa hi sualngan pi a tuahmi ṭheu a si ve lai. A si nain Jesuh sin zumhnak le sualngaichihnak lungthin he Jesuh sin zaangfah nawlnak a tuah tikah khamhnak a co. 

5.  Zaangfahnak, dawtnak, zawnruahnak, ... tbt ... hna hi Pathian thluachuah lawngte an si dih; nifatin kan nunnak ah a kan toih zungzal mi a si. Pa le Fapa le Thiang Thlarau cungah sunpar lianngannak um zungzal ko seh. Amen. 

Add new comment

3 + 1 =