Khrihfa mi hna nih cun…

Minung a si mi paoh nih hin mah le mah thangtthat duhnak le lianhter duhnak lungthin te hi kan ngei cio hna. (Manah) timi ruamkai duhnak lungthin le i uan duhnak lungthin te zong hi kan ngei cio hna. Mithiang Paul nih cun: “Porhlawt a duhmi nih cun Bawipa nih a tuahmi kha i porhlaw ko hna seh”(2Cor 10:17) tiah a ti.

Tthawnnak hna le lianngannak hna cu Pathian sin in a ra mi an si. Minung ruahnak ah cun “khua fakpi a ruat kho mi hna le thil lianngan a tuah khomi hna lawng khi mi lianngan ah kan ruah men hna lai”. A thil ti khawh nak hna le a ruahnak hna nih Pathian Pennak ah a phanhter khawh lo a si ah cun zeidah a tthat hnemhnak a um hnga? Zeihmanh san a tlaihnak a um lo.

Jesuh Khrih nih a kan cawnpiak mi le lam a kan hmuh sak mi cu, tangdornak lungthin, lungthin thiannak, ngakchia nih a nu/pa aa bochan bantukin Pathian cungah bochannak lungthin ngeih ding, pakhat le pakhat cungah upatnak lungthin ngeih ding le dawtnak lungthin ngeih ding hna hi an si.

Nihin Bupi nih mithiang Therese puai ni a kan tuah piak. Bupi nih puai a kan tuah piak tikah lawmhnak men siloin mithiang hna nunning zia hna kha ruah tthan i anmah hna bangin kan thlarau khamhnak a co khawh nak hnga ding caah kan pumsa in siseh, kan thlarau kan ruahnak in siseh thianghlim tein Pathian duhmi zulh ding le tuah ding kha a kan duh piak mi a si. Mithiang Therese bangin Pathian duhnak aa nunpi zungzal kho tu si khawh i zuam cio hna u sih.