Khrihfa Nun Zia

Nihin kan Bible thiang kan rel mi kan zoh tikah Peter cu Jential mi hna sinah a kal i a voi(1)nak tipil nak a pek hna nak kong kan hmuh. Cornelius timi pa le a chungkhar hna nih Thiang Thlarau laksawng auhnak an hmuh tikah Joppa khua i a um lio mi Peter le a hawi le hna kha an va auh hna. Peter le a hawi le hna zong Jential mi hna nih Pathian kawhnak an hmuh ve an co ve tikah an khuaruah a har ve. An lung chungah a hung fiang mi cu “Pathian khamhnak le khawhnak cu mi vialte hna caah a si” ti kha an hun i fiang hna. Peter nih aa thawh i: “Atu cu Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah, amah a tihmi paoh le dinnak a tuahmi paoh cu a cohlan hna” (Acts 10:34-35)tiah a ti. Cu tikah Peter zong Bawipa Jesuh nih a rak chimh mi: “Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai”(Matt 16:19) timi bia kha a hung tling.

Judah mi hna caah cun Jential mi hna hi a thiang lo mi hna tiin rak hmuh mi an rak si. Peter le a hawi le hna ca zongah an phunglam he aa ral chan mi thil tuah ding le biakhiah ding hi a har ngaingai mi a si. Sihmanhsehlaw, Jesuh nih a rak pek mi nawl ngaihnak “tawhfung” kha amah pumpak pakhat biachahnak in a rak tuah: “Hi mi hna nih hin Thiang Thlarau cu kanmah nih kan rak hmuh bantukte khan an hmuh ve. Cucaah ti in tipilnak in awkah aho nih an dawn kho hna hnga maw?”(Acts 10:47)tiah a ti i tipil nak a rak pek hna. Jerusalem i a um mi Khrihfa hna sinah ka va kir ta lai i meeting- biachahnak kan ngei ta rih lai ti zong in a rak ti hna lo.

Cu a si caah kan nih vialte hna hi Pathian hmai ah ahohmanh aa tluk cio in dawt kan si mi hi thei cio hna u sih. Mi zei bantuk mi hna cung hmanh ah thlei dannak ngei hna hlah u sih. Kan Bawipa Jesuh Khrih hrimhrim nih mi vialte khamh kan si nak hnga ding caah a thisen in a rak kan cawk cang bangin kan nih hna zong nih a kan cawnpiak mi “dawtnak” lungput he nung zungzal hna u sih. Mi vialte hna sinah Jesuh Khrih he aa lo mi muisam a langhter kho zungzal tu nunzia le Khrihfa tha si khawh i zuam zungzal hna u sih.

“Pathian cu dawtnak a si”(1Jn 4:7-10).