Khrihfa Nunzia

Jesuh nih a zultu kha a chimh hna i, “Sualnak chungah mi a tlaktertu thil cu an um ṭheo lai; sihmanhsehlaw cu thil hna a umtertu caah cun ṭihnung a va si dah!” (Lk 17:1)

Khrihfa kan si hnu ah ṭhatnak kan tuah mi hna le kan zulhmi phunglam hna hi leng lei in “Kei cu Khrihfa ka si” timi langhter nak menmen an si hna lo. Khrihfa pakhat sinak i kan theipar tu a si deuh. Hi ṭhatnak theipar zong hi Jesuh Khrih he i pehtlaihnak in a hung chuak mi a si. 

Khrihfa pakhat kan si ah cun ṭhatnak tuah ding timi cu kan tuah hrimhrim dingmi a si. Cun ṭhat lonak kha kan doh ding zong a si fawn. Duh ah cun tuah, duh lo ah cun tuah lo timi a ngah lo. Mithiang Paul nih Bupi chungah hruaitu pakhat sinak i tuah hnga ding mi le zulh hnga ding mi tete hna kha Titus 1:1-9 chungin fiang tein a langhter: “Khrihfabu hruaitu cu Pathian rian ṭuantu a si caah mawhchiat awk a um lomi a si lai. Cawnpiaknak ahmaanmi aa tlaih pengmi a si lai.” Cun hi Bible catlang hna zong nih hin hruaitu pakhat sinak i a biapit ning zong kha langhter mi a si fawn. 

Paul nih, “Pathian sal le Khrih Jesuh sal ka sinak a langhtertu cu zumhnak le hngalhnak le ruahchannak an si, zumhnak cu Pathian nih a thimmi hna chung i a hung thomi zumhnak, hngalhnak cu kan biaknak phung nih a kan cawnpiakmi biaktak hngalhnak, ruahchannak cu zungzal nunnak i ruahchannak. Cu zungzal nunnak cu lih a chim kho lomi Pathian nih caan hramthawk hlan in a kan kamh cangmi nunnak kha a si i atu ah amah nih a caan a rem a timi caan ah a phuan cang,” tiah a ti. (Tit 1:2-4) 

Mithiang Paul nih Khrihfa mi hna kan nunnak ah “Mawhchiat awk a um lomi” si dingin a kan cawnpiak. Khrihfa mi hna nih hin ningzahnak a chuahter tu hrampi kan si lo ding zong a herh. Khrihfa phunglam ning in kan nun a si ah cun hi vawlei tukforhnak hna nih hin a kan tei kho lai lo i ningzahnak buaibainak a chuahpi tu zong kan si lai lo.