Khrihfa Rian

“Tuah u tiah fialmi rian kha nan tuah dih tikah, ‘Kannih cu sal santlailo kan si, kan tuah awk hnga rian a simi lawng pei kan tuah ko cu,’ va ti u” tiah a ti hna. (Lk 17:10)

Khrihfa pakhat kan si ah cun Pathian cawnpiakmi phunglam hna kan zulh hrimhrim ding a si. Khrihfa ka si tiah aa timi paoh nih midang hna cungah mah le si khawh ning cio in bawmhnak pek ding ṭuanvo zong kan ngei. Cun Bawipa cawnpiakmi “Mi nih kan cungah tuah hna seh ti nan duh bantuk khan midang cung zongah va tuah ve u” (Matt 7:12) timi zong kha kan theih zungzal ding a herh fawn. Jesuh nih a zultu hna sinah Pa Pathian sin in a theihmi vialte kha a cawnpiak chin hna i, cun a zultu hna zong kha midang cawnpiak ve hna ding in a thlah chin hna. 

Jesuh nih a fial hna bangin (Matt 28:19) zultu hna zong nih vawlei cung khuaza kip ah kal in Bawipa Thawngṭhabia kha an rak phuan caah nihin ni zongah nang le kei nih Bawipa khamhnak thawngṭhabia kha kan cohlaan khawhnak hi a si. Khrihfa kan sinak ah thil pakhat khat “Pek kan si mi cu midang hna kha cheuhbauh chin dingin pek mi a si”. Mah ca lawngah i chiah ding a si lo. Pathian thawngṭhabia a thei rih lomi hna sinah phuan chin ding, cun hmai lei caan ah a hung um te hnga ding mi tefa vialte hna ca zongah Pathian thawngṭhabia thiang ro kha chiah chin ding a si. Cu thawngṭhabia cu a chim lawng siloin thil ṭha kan tuahsernak in nifatin kan langhter ding a si. Kan nunnak hrimhrim hi midang hna caah Pathian chimphuan duhmi “Bia-message” a si ding a si. Midang hna nih a kan hmuh nak in Pathian an thangṭhat khawh ding le Pathian an hmuh khawh ding kha a biapi mi a si.

Thil pakhat khat kan tuah khawh tik zongah kan mah thil ti khawhnak, keimah ṭhawnnak le thiamnak a si timi lungput ngeih lo ding a si. Kan theih ding mi cu Khrihfa kan sinak ah hin: “kan tuah awk hnga rian a simi lawng pei kan tuah ko cu” (Lk 17:10) tiin tangdornak lungthin he kan cohlaan thiam ding kha a si.