Khua an Hmu Kho Than

Nihin ni caah Bupi nih a kan thim piak mi cathiang (Matthew 9:27-31) chung kan zoh tikah Jesuh Khrih le mitcaw pahnih hna kong hi a bik in langhter mi an si kha kan hmuh khawh. Mitcaw pahnih hna nih Jesuh Khrih an pawngah a kal an theih tikah a hnu in an zulh i “David Fapa kan zaangfah tuah” tiin an au i bawmhnak an hal. Zeicah tiah cun mitcaw pahnih hna nih hin Jesuh nih damnak a kan pek khawh timi an zumh caah a si.

Jesuh nih bia a hal mi hna cu: “Hihi ka tuah khawh tiah nan zum maw?” tiah a ti hna. An leh ve mi cu “Asi, na tuah khawh tiah kan zumh bawipa” tiah an ti. Cun Jesuh nih an mit kha a tongh hna i, “Nan zumhning te cun si ko seh” tiah a ti hna i mitcaw pahnih hna cu khua an hmu kho than.

Kan nih hna nih teh Jesuh sinah zeibantuk thil dah kan hal ve cio tawn hna? Mitcaw pahnih hna bangin kan herh taktak mi thil hna caah Jesuh hnu zulh buin kan hal, kan au bal ve cio tawn hna maw? Jesuh Khrih nih kan herh mi thil hna hi a kan pek taktak kawh ko timi zumhnak teh kan ngei ve cio hna maw? Kan thlacam nak Pathian nih a kan let lo tiin thlacam duh ti loin Pathian kha kan hnu kan chit tawn hna maw?

Jesuh nih cun kan thlacam nak hna kha a kan theih piak taktak ko i kan herh taktak mi zong a kan pek taktak ko. Kan thlacam a kan leh ning cang hna le thluachuah a kan pek ning cang hna tu kha a hmuh zia thiam kan herh.

Cun Jesuh Khrih hnu zul Khrihfa kan si caah thlarau lei in mitcaw mi hna kha “Khamhnak lam” hmuhter khawh le zulhter khawh i zuam hna u sih. Cucu Khrihfa mi hna kan rian a si(Mk 16:15).