Kut Lawng in maw Bawipa na ton lai?

"THLAICI TLAWMTE A TUHMI NIH, THEIPAR TLAWM TE A ZUN TAWN, TAMPI A TUH MI NIH TAMPI A ZUN TAWN"  (2 cor. 9:6)

                Atu kan caan hi a donghnak lei caan a si cang tiah cawnpiak kan si bang in, hi a donghnak lei kan caan tawi te chung ah hin, i hlerhlau deuh in thlaici tam pi tuh kan hau. Tappi khor lawng ahcun, thlaici tuh khawh a si lo caah, pumpak cawlcangh in, ttuan khawh a si. Na pawngkam ah thlaici tuhnak vawlei ttha tampi an um ko khah. Hlerhlau lungtthanghnak na ngeih pah lo ahcun, na pawngkam ah zeitluk vawlei ttha a um i, hmailei ah a miak tampi hmuhkhawhnak lam a um len zongah, na ttuan huam theng lai lo.

                Tipil in, sualthlah hal, Bawipa thisa ei, zarhpi ni hrelh lo te i, i pumh khawh lawng hin, na hna a ngam ko maw? Vancung khua ah theipar zuun ding laksawng na ngei lai lo hih. Hebrew 6:2-3 ah "Tipil innak te hna, Kutchuannak te hna, mithi thawhtthannak te hna, zungzal biaceihnak kong te hna hi, anhram ah i hel lengmang ti hlah usih. Hmailei ah kal usih, Pathian a hna a tlak ahcun, kan kal kho hrim ko lai," a ti.

                Pawngkam siaherhnak lo ah thlaici na tuh bal lo ahcun, theipar zuun ding na ngei te lai lo mu. Na inn pa na sangveng ah siseh, lo nan kal ram nan riah le khualtlawn nak ah siseh, thazaang pe tu dirhmun ah na dir kho tawn bal maw? Cucu Jesuh nih an siter duhbik mi a si. Matt. 12:30ah "Pumh khawmh a ka bawm lo mi cu, tthektu an si," tiah Jesuh nih a kan ti. Cu caah hla phuahtu zong nih "Ka kut lawng in ka kai lai maw, hibang khamhbawi tonawk ah, hawikom te hmanh sawm hin loin, zeitin hi bang in kai lai," tiah hla in a phuah ve.

                Pawngkam i a tlau cuahmah lio mi le phaikung bang thli hrannak kip ah aa thui thluahmah lio mi, thlarau hna ca i siaherhnak ngeih cu Jesuh hmai ah cun a va sunglawi ee. Cu thlarau lei siaherhnak hma a kal tertu bik ah hin, pumsa lei zawnruah siaherhnak hi an tuah hmasa tawn. Cucu vawlei cung Khrihfa karhnak kong le evangelist pawl an tuanbia ah tampi a lang ko. Jesuh nih "Mi sifak nan bomh hna poh ah khan, keimah nan ka bomh a si ko," tiah a ti. Pathian nih pahrang phunkhat cio cu a kan pek ko. Hawidawt nang tah, pawngkam thazaang pe kho ding in Pathian nih zei pahrang thluachuahnak dah an pek. Chawva in maw, fimthiamnak in maw, thazaang in dah, na ti khawh tawk leng cu Jesuh nih an hal lai lo.

                Vancung ah laksawng tampi chiahpiak kan si ko. Cheukhat nih cu laksawng cu, mirum hna caa lawng ah a si tiah an cawnpiak. Cu nih cun, mirum pastor le Pathian rian ttuantu hna lawng khi zoh cho in, sifak deuh Pathian rian ttuantu hna zoh chuk deuhnak a chuah ter. Cucu palh cawnpiaknak a si. Zeicahtiah Pathian rian ttuan zultu 12 hna le Paul nih, an mah zoh chun ding in fial kan si (1Cor 11:1). Sifak te in rian an ttuan, hremnak phungtling le saarthihnak tiang an in. Cun zumlo tu mifim thiam,  mirum le milian liangluang hna khi tah Pathian an theih ttung lo. Cu caah pei paul nih "Biaknak hi rumnak lam pakhat ah an ruah," a ti cu(1Timo 6:5).

                Cu caah laksawngttha le theipar tampi zuunduh ahcun, thilhme te kong kau zong ah a ttha ko a poi lo, ti men lo in, a ttha chinchin in si khawh i zuam kan hau. Hmai nawrnak khul zong a rang deuh lai. Bianabia pakhat ah, Kawlram i sianginn kan kai lio ah kawlholh naal deuh le awfiang te in kan chim khawh lo tik ah, kawl pawl nih an ning a zak sual lai ti phan in, fiang set sai lo i nan chim mi hi ngaih a nuam, a ttha ngai tiah a kan ti tawn. Mi thluaktlawm pawl cu kan i lung hmuih ngai i, awfiang le ttunttan lo te i chimrel khawh hi zuam kan i tim ti lo. Asina in biapipa, milung suu le milung lut kho deuh ding chim can a phak tikah cun, tluk in kan i dang cang. Miphun dang holh cu va um ko seh, kanmah le kan holh te hmanh, pulpit hmai i, uh uh ah ah i kam rel hna khi, pawngkam a ngaitu zawnruah lo a si pin ah, miphun sunhsak lo le zeirel lo a si khih. A khua kip nan si cio ttheu lai tiah ka ruah. Thil hmete ah a poi lo, a ttha ko ti mi nih thilngan pi zong ah a ti tthiamtthiam ko lai.

                Cu caah kutput te he Bawipa hmai ton ding ah cun, phung tlamtlinnak men i fel sawhsawh le a poi lo attha ko ti sawhsawh men cun, kan hlawh a tling kho hnga maw? Thlarau lei i mi sia herh a hngal mi cu pumsa lei zong ah mi sia herh an hngal tawn.

Catialtu /-  George Zaang Hai