Lehrul cham hna hlah u

Midang pakhat khat nih fahnak an in pek ah siseh, na cungah nahchuahnak an ngeih ah siseh, zeitin dah na leh tawn hna? Zangfahnak thinlung he maw na leh tawn hna, lungfahnak in dah? Kan Bawipa Jesuh Khrih nih a kan cawnpiak ning ah cun lehrul va cham hna hlah u tiah a ti (Matt 5:38-42).

Cu bantuk thinlung ngeih khawh nak ding caah cun kan Bawipa Thlarau kan ngeih a hau . Khrihfa hna nih nihin ni tiang zongah hram le thahnak vawlei cung khua zakip ah an ton cio hna. Kan mah Khrihfa hna karlak lila hmanh ah pakhat le pakhat i soisel nak hna zong hi hrem le thahnak phun khat a si ve. Thlarau lei in tthancho khawh lo nak hnga ding caah lam a dawn khan tu zong a si. Minung si ning cun in khawh cu a har ngai ko. Sihmanhsehlaw, hlaan Khrihfa hna kong kan zoh tthan tikah tuk velhnak le thahnak an ton mi vialte hna kha ngaihthiam nak in an ral hna cungah teinak an rak hmuh khawh taktak ko. Kan Bawipa vancung a kai hnu Bawi Khrih hnu zultu hna kum 300 renglo an rak tleih, an rak hrem hna i an rak thah ko hna nain Bawipa cawnpiak ningin an rak nun tikah an ral a si mi hna hmah an khuarauh a rak har i lungthlennak an rak ngei hna.

Bawipa hnu a zul mi hna le a zullo mi hna an i thlei dan nak cu lungsau tein le toidor tein an rak nun kha a si i, an ral a si mi hna i sual palhnak an ngeihthiamnak hna nih hin a bik in a langhter khun. Tu chan zongah hlanchan bantukin i cawnpiak le i tthithruai a si caah zeitluk hmanh in an inn an lo a hrawh paik hna zongah siseh, thahnak an in zongah siseh, bupi nih cun ngaihthiam nak in a in tuar piak peng ko hna. Hlaan bangin tu chan zongah Bawipa cawnpiak nak cu zulh le i cawnpiak peng a si ko.

Cu a si caah, dawtmi u le nau hna, pakhat khat nih nan cungah chiatnak a tuah ah siseh, ningcang loin nan hmai chiatter an i timh tikah zeitin dah nan leh cio hna. Bawipa cawnpiak ning in maw, siloah vawlei thil kal ning in dah?