Leng lei maw Chung lei dah?

Nihin ni caah Bui nih a kan thimpiakmi Gospel (Mark 7:1-13) kan zoh tikah Farasi mi hna nih Jesuh le a zultu hna an mawhchiat hna nak kong a si. Zei ruangah dah a si hnga kan ti a si ah cun thianter nak tuah loin an kut tawl loin rawl an ei caah a si. Rawl ei hlaan ah i thianternak, thianhlimhnak (kuttawl) tuah hmasat cu Judah miphun hna nih an zulhmi phunglam a si. “Farasi mi hna le Judah mi hna nih cun an pupa nih an cawnpiakmi hna phung kha tha tein an zulh: cuticun nan kut nan i tawlning a si lai, timi ning in an i tawl lo ahcun rawl an ei lo.”(Mk 7:3)

Cucaah Farasi mi hna le Phungbia cawnpiaktu saya hna nih khan Jesuh cu an thawh i, “Zeicahdah na zultu hna nih hin kan pupa hna cawnpiaknak ningin zul loin kut tawl loin rawl an si?” tiah an ti. Jesuh nih a leh mi hna cu “Nannih nih cun Pathian nawlbia kha nan chiah riangmang i minung cawnpiaknak tu kha nan zulh deuh” tiah a ti hna.

Dawtmi u le nau hna, leng lei in Pathian thangthat cu a fawi ngai ko. Sihmanhsehlaw lungthin tak tein Pathian kan dawt kan thangthat kha a herh taktak mi cu a si ko. Kan lungthin tak tein Pathian kan thangthat, kan dawt a si ahcun Pathiang kan dawtnak i a theipar cu leng lei kan tuahsernak ah hin a lang ko lai. Pathian kan dawt bantukin minung pakhat le pakhat kan i dawt zong hi a herh taktak mi a si.

Aparpavuan thangthatnak le dawtnak siloin pakhat le pakhat biatak tein i daw hna u sih. Pathian kan dawtnak kha kan tuahsernak in langhter hna u sih.