LENT (ULH CAAN) ZARHKHATNAK

Voikhatnak Bible - Gen 9:8-15 Salm - 25:4-9 (lehnak 25:10 ) Voihnihnak Bible - 1Pet 3:18-22 Thawngtha Bia - Mk 1:12-15 PHUNGCHIM DING AMURU - Pathian nih Israel hruaitu hna a si mi Noah, Abraham, Moses pawl hna sin ah biakamnak a tuah mi kan hmuh khawh. Hi biakamnak hna hi kan zoh tikah Pathian nih vawlei cung mi hna nih ka dawtnak le ka khamhnak hi co hna seh, ti duh ah duhsah tein a leem hna i a tuahpi mi hna a si. Abik in Pathian nih a duhmi cu, minung nih ka sinah zumhtlak si hna seh, ti hi a si. - Pathian nih cun a biakam bantuk in zumhtlak a si nak kong le zeitik hmanh ah a bia kam a leet lo nak kong zong kha Noah, Abraham, le Moses, hna cungah fiang tein kan hmuh khawh. Asinain Israel mi hna nih cun Pathian kha an hlawtnak caan a um `heu tawn. Pathian biak lo in a dangdang, tuah chom mi cawzuk, tibantuk te hna an biak tawn. - Minung nih Pathian sinah zumhtlak sihlah hmanh usilaw Pathian nih a kan dawtnak cu a zor bal lo, a fapa ngeihchun Jesuh hmang in biakam thar a kan tuah pi than. Hi biakamnak hi cu zeitikhmanh ah a rawk lo ding in kau ngai le saang ngai in a kan tuah piak. Pathian dawtnak le vel ngeihnak cu a hlan nak in kau ngai le ceu ngai in a tu chan ah a lang. - Jesuh hrimhrim nih hi biakamnak cu, hmanungbik zanriah ah a chim i a thaizing ah vailam cung thihnak in a kan hmuhsak. A thi le a sa cu leicung minung vialte nih zungzal nunnak caah kan ei ding in le a mah he zungzal um ti nak ding caah bia a kan kamh. - Pumpak cio in Pathian he kan biakam nak cu, Tipil innak in kan feh ter i kan langhter. (Tipil kan in lio i Pathian sin i biakamnak kan tuah mi biafang pawl kha a hramthok in vun ruat than ding) - Lent (ulh caan) ti mi cu, Pathian he biakamnak kan tuah mi kha khuazei zawn dah ka phanh cang tiah mah le mah i purhdah nak caan, cheking i tuahnak caan a si. Jesuh hrimhrim nih mah kha tuah dingah nihin thawngthabia nih a kan fial. Kan sualnak i ngaihchih in thawngtha bia a kan chimh ning in zulh awk ah a kan fial.