Luatnak le Damnak

Nihin ni caah Bupi nih ruah ṭi dingin le thazaang lak ṭi dingin a kan thimpiakmi cathiang cu (Luke 4:31-37) a si i Jesuh nih khuachia a ṭhawl nak kong a si. Jesuh cu Galilee ram i khua pakhat, Kapernaum khua, Sabbath ni ah a cawnpiak hna lio ah khan cu pumhnak inn ah khuachia nih a rak tuahmi pa pakhat nih, “Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko – Pathian lamkaltu a thiangmi na si ko,” (Lk 4:31-34) tiah a ti. 

Khuachia cungah Jesuh a nawl ngeihnak hi zoh ta hna u sih. Jesuh cu huham a ngeimi le nawl a ngeimi a si; zeicah tiah cun a dingmi a si; a chimmi bia in siseh, a tuahsernak in siseh zeitik hmanh aa pialkalh bal lo. A chimphuan bantukin a tuah tu a si. Dawtnak kong a chim i midang cungah dawtnak a langhter tu le dawtnak in zeizong te a tuahser dih tu a si. 

Bia le tuahsernak, zumhnak le tuahsernak timi cu tangka pia kapkhat lei le kapkhat lei aa pehtlaih bantukin aa pehtlai zungzal mi a si. Pakhat lawng zulh cu kutzapei pakhat lawngin kut bengh timh khi a lo ko lai. A aw a chuak kho bal lai lo.

Pahnihnak ah ruah ṭhan ding a ummi cu “Khuachia thlarau a ngeimi pa” timi hi a si. Hihi kan zohtikah lung daihnak a ngei lomi hna khi a chim duhmi a si. Zeithil an tuah paoh ah an kan hrem, an kan nek, zei a kan rello timi lungput an ngeih caah cu lungput nih cun fahnak lawng kha a pek zungzal ko hna. Hi bantuk mi hna cu mah zawn lawng aa ruahmi an si caah midang cungah dawtnak an ngei kho bal hna lo. Thinlung chungin daihnak a ngei lomi hna cu pakhat khat nih a ṭhihphaih peng mi hna bantuk khin an um. 

Pathumnak ah ruah ṭhan dingmi cu: “Dai tein um law, mipa chung khan chuak,” timi hi a si. Taksa lei in siseh, thlarau lei in siseh, Jesuh nih a kan khamh ding hi aho paoh nih kan herh cio mi le kan duh cio mi a si ko. Kan lungchungah daihnak a um nak hnga ding caah hin cun Jesuh bawmhnak kan herh zungzal ko. Kanmah tein zeihmanh kan tuah khawh lo caah a si. Nifatin thinphannak, ṭihnak hna le launak a kan pe zungzal tu (satan) hna sin khan kan luat khawhnak hnga ding caah Jesuh Khrih kha kan herh. Zeicah tiah cun thinphan thlalaunak hna nih hin biatak hmuh khawhnak mit a phenh khawh tawn bantukin thihnak le tlaunak lei ah a kan phanh ter khawh caah a si.

“Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak,” tiah a ti bangin Jesuh Khrih kan sin a um ve a si ahcun, asiloah Jesuh Khrih sin kan panh a si ahcun harsatnak a kan petu hna kut in kan luat kho zungzal ko hna lai.

Nan dihlak cungah Pathian nih himnak le damnak in pe cio ko hna seh.