Luke 12:49-53

Photo Credit

Tthen tthek tu tiah Bawipa nih a ti tikah zei bantuk khi dah a si hnga? Bupi tampi a sertu maw? Bu a dirh tu maw?  Asiloah, khua pakhat le pakhat a tthen ttek tu maw? Chungkhar chungah rem lo nak a tuah tu pawl maw?

Kan Bawipa Jesuh Khrih cu vawlei hram aa thawh ka in nihin tiangah a mah tluk in tthennak a tuah kho tu hi an um rih lo. He bantuk tthennak a tuah tu a si kan ti tik ah kan lungchung ah a hung chuak kho mi cu chiat nak lei kap in kan ruah sual men hna lai. A si lo. A thainghlim mi kha a thurhnawm mi chungin a tthen tu a si ti hi kan theih a herh.

Bawipa nih: “Vawlei hi mei in duah awkah pei ka rat cu, alh hluahmah cang seh law ka hei duh dah! (V 49). Cun “Tipil in awk pakhat ka ngei i cucu a dih hlanah cun ka lungre a va thei dah(V 50)” ah a ti rih. Hi biatlang pahnih hna hi kan zoh tikah ttih nung le thinphang in a kan tuah tu ah kan ruah men ko lai. Sihmanhsehlaw, Bawipa nih fiang deuh tein a langhter tthan mi cu: “Vawlei cungah hin remnak tlunter awkah a ra ti ah dahra nan ka ruah? Remnak si loin ṭhennak tu tlunter awkah ka ra” (V 51) tiah a ti tthan.

Hi konglam pahnih hi ruat tti hna u sih. Tipil nak a ti tikah John the Baptist nih (Matt 3:16) i a rak pek hna mi tipil nak kha a chim duh mi a si lo. Luke 12 chungum tipil nak a ti mi hi cu hmailei a ton hnga ding mi “temh in nak le thihnak” tipil nak a ti duh nak a si. Bawipa Jesuh cu tipil bantukin vawlei chungah a lut lai ti zong in ti khawh a si. Hi tipil nak nih a chuah pi hna ding mi cu a thainghlim ti lo mi vawlei chungah a thianghlim bikmi Bawipa a lut lai i cu a luhnak nih cun mei in sui an thenh bantuk in zeizong vialte a thian ter tthan lai.

A ttha mi le a chia mi thleidannak, a thianghlim mi le a thurhnawm mi thleidanank tbk,… fianglak tin tthen awk ah Bawipa Jesuh cu vawlei ah a rungtum. Bawipa nih: “Thil ṭhalo a tuahmi paoh nih cun ceunak kha a huat i ceunak i rat kha a duh lo, zeicahtiah thil ṭhalo a tuahmi langh kha a duh lo. Sihmanhsehlaw thil hmaan a tuahmi cu ceunak ah khan a ra i a tuahmi kha Pathian duhnak zulh in a si ti cu ceunak nih cun a langhter,” tiah a ti( Jn 3:20-21). Thil ttha lo a tuah mi nih Bawipa kha an huat lai, an zamtak lai i thial ttha a tuah tu, ceunak chungah a um mi Bawipa a daw mi hna cu Bawipa sin ah an ra lai. Hi hi cu, phu chungah siseh, peng chungah siseh, chungkhar chung zongah siseh a si tak tak te hnga dingmi thil a si. Zeicah kan ti a si ah cun Bawipa a chim mi bia cu a hmaan mi le a dik mi a si hlei ah hnu lei caan ah a hung tlin tak tak.

Bawipa cu “Daihnak a phortu zong a si.” Bawipa nih, vawlei ah daihnak siloin tthenawk tiah a timi a sullam cu vancung pennak ram he aa ralchanh mi phu vialte a ti duh nak a si. Bawipa a thih, an vui i a thawhtthan nak nih kan cacah daihnak, Pa Pathian he i rem tthan mi sining panhtthan khawhnak a kan phak ter caah a si. “Cu ti kan aunak ah cun Pathian Thlarau le kan thlarau cu hmunkhat ah an i fon i Pathian fa kan si kha tehte an khan; fa kan si ahcun rocotu zong kan si colh” tiin mithiang Paul nih a ca kuat ah fiang tein in a langhter ve (Rom 8:16). Jesuh nih a kan pek mi daihnak cu Thiang Thlarau Pathian sinin a chuak mi theipar (Gal 5:22, daihnak saphaw angki (Eph 6:15) le “Cun Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai (Phil 4:7).”

Add new comment

2 + 5 =