Lungdong loin Hal

Thla na cam tikah zeitluk lungsau in dah na cam tawn? Thla na cam mi na hmuh tiang maw? Asiloah na thlacam a tlin hlan ah maw na mak tawn, zeitin? Thla kan cam tikah lungdong lo tein kan cam ding a si. Minung pakhat Pathian cungah zeitluk in dah a zumh timi theih kan duh a si ahcun zeitluk lungsau in dah  a thla a cam timi in pedaan tah khawh a si ko. A zumh ruangah a hal peng nak le thla a cam peng nak a si ko. Jesuh Khrih nih lungdong lo tein Pathian sin ah thlacam ve ding in a kan duh piak, a kan cawnpiak i a kan sawm lengmang. 

Kan duhmi a um ahcun cat loin hal ding a si ko. Nihin ni caah Bupi nih a kan thimpiak mi cathiang Luke 11:5-13 chung zongah zumhnak he lungdong lo tein Pathian sin thlacam ding in Jesuh nih a kan cawnpiak. 

Jesuh nih, “Hihi kan chimh hna: Hal u law pek nan si lai, kawl u law nan hmuh lai, king u law innka cu hunpiak nan si lai. Zeicahtiah a halmi paoh cu pek an si lai i a kawlmi paoh nih an hmuh lai, a kingmi paoh cu innkhar kha hunpiak an si lai,” tiah a ti (Lk 11:9-10). Zan ṭim ah a hawipa sin a va kal i a khualtlung caah ei-awk a hal mipa pakhat nih a duh mi a hmuh nak cu cat loin a hal peng caah a si. “Ka kawi pa nih hin a ka pek hrimrhim ko lai,” timi zumhnak le ruahchannak a ngeih caah a si. A zumhnak nih a duhmi kha a hmuhter ko.

Pathian sinah thla kan cam cio ko hna. Zeitin dah thla kan cam i kan hal cio ning a si. Ka hmuh hrimhrim lai timi zumhnak in maw thla kan cam, asiloah ka thlacam Pathian nih a kan let lo tiin maw thlacam kan ngol? Ruat cio hna u sih. Kan duh taktak mi le kan herh taktak mi thil a si ahcun kan hmuh hlan lo chung kan kawl tawn, hmuh kan i zuam tawn bangin Pathian sin zongah cat loin thla kan cam zungzal ding a si. Jesuh nih, “Vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai,” tiah a ti.