Lunglawmhnak

Jesuh cu a zultu hna leiah khan a hei i mer i anmah bing tein, “Nan hmuhmi thil nan hmuh caah hin zeitluk in dah nan caah lunglawmh awk a si,” tiah a ti hna. (Lk 10:23)

Nihin Missa raithawinak ah kan relmi cathiang (Luke 10:21-24) nih Bawipa a lung aa lawmhnak kha a langhter: Khi tikah khan Jesuh cu Thiang Thlarau nih lawmhnak in a khahter i, “Maw ka Pa, van Bawi le vawlei Bawi a simi, mifim le mithiam hna sinin na rak thuhmi kha fimnak le thiamnak a ngei lomi hna sinah na langhter caah hin nangmah cu kan lawmh,” tiah a ti. 

Dawtmi u le nau hna Thiang Thlarau Pathian nih cun thildik le thil hmaan a simi hna kha hmuhthiam, thleidan thiamnak in lawmhnak a kan pek zungzal ko. Mi cheukhat hna cu lenglei mithmuh in cun sifak, santlai lo tiah ruahmi an si ko men lai; sihmanhsehlaw thlarau tahnak pedaan - mithmuh in cun a rummi tampi an um kha theih ding a si. “Keimah” timi ruamkainak in a rummi an si lo. “Na bia bangin si ko seh” timi lungput in a rummi an si. 

Tu lio kan rampi nih a ton cuahmah mi harsatnak hna ruangah mi tampi cu pawṭam tihal in ramtang ah an zam hna i an i thup len ko hna. Sihmanhsehlaw hi bantuk harsatnak an tonmi hna nih an ning a zahter kho hna lo. Zeicah kan ti a si ah cun hramhram in an cungah tluntermi harsatnak hna an si caah a si. Palhnak an tuah lo ruangah midang hna cungah hmaikhah lonak zeihmanh ngeih ding a um lo. Chawva lei kap in cun an si a fak ko men lai, sihmanhsehlaw Pathian an i bochannak ah le an zumhnak lei ah cun a rum ngaimi an si kha theih ding a si.

Nihin kan relmi thawngṭhabia te hi zeitluk hmanh in tawi ko hmanhsehlaw thuk deuh in ruat cio hna u si. Zeitluk in dah Pathian nih a kan dawt i a thluachuah he nifatin a kan umpi? Nifatin Pathian sinin kan hmuh mi thluachuah tete hna hi (hmuh thiam) theihthiam dingin kan i zuam bal maw? Cun a kan daw zungzal tu Pathian zong kha a thangṭhat zungzal thiam kho tu kan si cang hna maw? Bawipa nih a kan umpi zungzal ko, thazang a kan pek zungzal ko timi zong kha theithiam cio hna u si. Bawipa Thiang Thlarau nih lunglawmhnak kan pe cio hram ko seh. Amen