Lunglawmhnak Bia Chim Thiam

Cun Jesuh nih amah cu a thawh i, “Tho law kal tuah ;na zumhnak nih an damter cang,” tiah a ti.(Lk 17:19)

“Maw Bawipa na ka pekmi thluachuah vialte hna caah Kaa lawm” tiah Pathian sinah a chim thiam mi Khrihfa kan si cang hna maw?

Nihin ni caah Bupi nih ruah ti ding le thazang lak ti dingin a kan thimpiak mi cathiang cu Luke 17:11-19 a si. A tawinak in kan zoh a si ah cun, thinghmui 10 hna Jesuh nih damnak a pek hna tikah Samaria mipa pakhat lawng nih ka dam cang ti aa theih tikah Jesuh sinah lunglawmhnak bia a rak chim timi kong a si. Lawmh nak bia a chim ruangah Jesuh nih a pekmi laksawng cu “na zumhnak nih an damter cang” ti a si.

Kan nu kan pa hna sin in minung cannak kan rak hmu hna i anmah hna nih an rak kan zohkhenh, an rak kan cawm, a kan huphenh i minung pakhat sining dirhmun ah an rak kan phanhter. Kan nu kan pa hna sinah “kaa lawm” timi bia kan chim bal hna maw? An duh herhmi hna cungah teh bawmhnak kan pe bal cang hna maw? Kan sik hna, kan hro hna a si ah cun, kan nu kan pa hna cungah sualnak kan tuah lawng siloin “Nu le pa upat dingah” nawl a kan petu Pathian cung hrimhrim zongah sual kan tuah a si.

A kan dawtu hna cungah lunglawmhnak bia kan chim thiam a si ah cun lunglawmhnak a karh chinchin. Pathian cungah lunglawmhnak bia kan chim, thla kan cam a si ah cun kan herh mi nak in a let in thluachauh a kan pek ko lai.

Samaria mipa nih lunglawmhnak le zumhnak he Jesuh sinah a panh tthan, a kir hnawh tthan tikah Jesuh hrimhrim nih a rak thangthat. Kan cungah lunglawmhnak bia a chim thiam mi hna cungah bawmh chinchin duhnak lungthin kan ngeih bangin, Pathian sinah a thluachauh hna cungah “Maw Bawipa, kaa lawm” tiah a chim thiammi kan si a si ah cun Pathian nih a let in thluachuah a kan pek ko lai. A kan hupphenh lai i a kan khamh zungzal ko lai. Lunglawmhnak bia chim ruangah lunglawmh chinchin nak a um timi hi philh lo ding a si.