Lunglawmhnak le Ngaihchiatnak (Luke 6:20-26)

Kan theih hngalhmi si hna seh, kan theih lomi si hna seh, “Nuamh na duh maw?” tiah hal hna u sihlaw “Ka duh” tiah a kan leh cio men lai tiah ka ruah. Asiahcun zeibantuk thil hna nih dah nuamhnak a kan pek khawh lai tiin ca in tialter hna u sihlaw, phaisa ngeih, ngandamnak, chungkhar hlawh tlinnak, rian tha ngeih, inn lo tlamtling tein ngeih, tiin an tial men cio hna lai.

Jesuh Khrih nih a zultu hna kha a zoh hna i lunglawmhnak le ngaihchiatnak kong a cawnpiak hna tikah:

“Nannih sifakmi hna i lawm u, Pathian Pennak cu nanmah ta a si.
Nannih atu i rawl a tammi hnai lawm u,
Nan paw a khim lai. Nannih atu i a tapmi hna i lawm u,
Nan ni lai.
Mi Fapa ruangah mi nih an in huat hna i an in hlawt hna i an in serhsat hna i mithalo an in ti hna tikah i lawm ko u. Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu.
“Sihmanhsehlaw nannih atu i a rummi, nan caah cun ngaihchia a va si dah! Nan nun nuamhnak kha nan hmuh cang. Atu i a paw a khimmi nan caah cun ngaihchia a va si dah! Rawltam in nan vak lai. Atu i a ni lengmangmi nan caah cun ngaihchia a va si dah! Ngaihchia in nan tap lai!
Mi vialte nih, an in chimthiam hna tikah nan caah ngaihchia a va si dah; zeicahtiah cuti te cun pei an pupa hna nih khan nal profet kha an rak ti hna cu,” a ti(Luke 6:20-26).

“Nannih sifakmi hna, nannh atu i rawl a tammi hna, nannih atu i a tapmi hna, i lawm u” tiah Bawipa nih a ti hna tikah minung sining in le ruah ningin cun a si kho bak lomi ruah ning a si. Sihmanhsehlaw Pathian ruahning in le hmuh ningin cun Fimnak bia le thluachauh bia an rak si ziar.

Hi cawnpiak nak ah hin “Keimah” timi ruamkai nak lungthin ngeih loin Pathian thawnnak cung lawngah bochannak lungthin ngeih dingin Bawipa nih abikin a kan cawnpiak duh mi cu a si.

Profet Jeremiah cathiang chungah kan hmuh mi cu, “Minung kha a bochan i minung kha aa hngatchanmi ah aa serh i Bawipa kha a mertakmi cu a cungah chiat tlung ko seh! Sihmanhsehlaw keimah kha a ka bochan i a ka hngatchanmi cu thluachuahnak ka pek lai”(Jeremiah 17:5,7) tiah a ti.

Pathian bochan cu minung thil ti khawhnak bochannak nak in himnak le thluachuah a um deuh. Pathian bochan cu kan lunglawmhnak a tlinnak hrampi a si.