LUNGNGETNAK THLARAU PATHIAN

PUMKHAT SINAK, LUNGNGETNAK THLARAU PATHIAN

Thiang Thlarau Pathian cu Khrih ah Pathian miphun thar kha a khawmhnak ah Babel i a cangmi holh phunphun hna, aa ṭhenṭhek mi miphunkip hna kha (Gen. 11:1-9), Pentecost ni ah hmasabik a pumh hna i, aadang mi holh phunphun hna kha siseh, miphun ṭengnge dangdang cio kha siseh, hmunkip le pengkip a ummi hna i ti le ramṭhen hna i ramri ṭhennak hna siseh, Thiang Thlarau Pathian nihcun a hrawh (Lam.2:1-11).

Pentecost ni ah a rak ṭummi Thiang Thlarau Pathian cu ṭhenṭheknak hna kha hmunkhatte ah asiter mi Bawipa a si. Pentecost ni ah a rak ṭummi Thiang Thlarau Pathian cu miphun, holh, hmun le tlang hoih in an ca cio ah Bupi saknak he a ralchan bakmi Pathian a si. Aruangcu ṭhenṭhekmi miphun dangdang hna, aa khatlo holh phunphun hna kha zumhnak pakhat ah tipil innak pakhat thawngin Bawi pakhat lawng (Efs. 4:5) i pum pakhatte lawng asimi takpum ah (Efs. 1:23) Thiang Thlarau Pathian nih a sak.

          Cu Bupi cu, Pathian innpi asi i, Khrih a zumtu hna cu, cu Pathian i innpi fale hna an si. Jesuh Khrih a zumhmi vialte cu miphun cio in, caholh ning cio in, vawlei hmunhma ning cio in mahle caah Pathian inn asi tiin Bu an dirh cio lo. Lamkaltu hna thawkin profet hna an simi hrampi tlakrawh cungah thapkhat in an sakmi asi.

          Khi tlakrawh innki, innkil lung cu Jesuh Khrih asi. Cu lung he tlakrawh inn dihlak cu pehtlaihin a ṭhan caah, Bawipa caah a thiangmi Biakinn (Bupi) asi. Cu biakinn zongah Pathian cu Thiang Thlarau in a umnak ding caah Khrih a zumtu vialte cu lamkaltu hna he hmunkhat in sak asi (Efs. 2:19-22).

Cucaah Thiang Thlarau Pathian kha hngatchanh minchalh in siseh, Thalrau laksawng hna kha hngatchanh minchalh in siseh, vawlei lei kong, miphun kong, zatlang nunphung le a dangdang konglam tampi hna minchalh in siseh, lamkaltu hna sinin kan rak lakcia mi zumhnak he pehtlai mi cawnpiaknak hna he aa ralchanh mi bu ṭhenṭheknak hna a tuahtu hna, a palhnak kong a chim tawntu hna kha, ralring in hrial ding asinak kong kha mithiang Paul nih fektein ralring a rak pek (Rom. 16:16-17).

          Bu ṭhentu kha voihnih tiang chimh i a ngaihchih lo ahcun Bu chungin ṭhawl an silai. Aruang cu cutin bu ṭhentu cu Thiang Thlarau Pathian he aa pehtlai lo, minung kokek ning in a zulmi asi. Cupinah cubantuk mi hna cu mah sualnak aa theihko buin sualnak a tuah i Thiang Thlarau Pathian min kha ningcang lo hman nakin a lettalam thinlung a ngeimi an si tiah (Titus 3:11) mithiang Paul nih a rak cawnpiak. Bu ṭhennak a chuahtertu hna cu an pumsa duhnak nih a ukmi, Thlarau a ngeilo mi an si (Judas 1:19).

          Thiang Thlarau Pathian cu bu thleidannak, buṭhennak, bu dirhnak hna he aa pehtlai lo. Khrihfa bu dirhnak caah aho sin hmanh kha ceunak le laksawng a pe hna lo. Asinain, Jesuh Khrih nih a rak dirhmi pakhat pumkhatte asimi Bupi sakcio dingah pakhat cio kha laksawng a kan pek (1Kor. 12:14). Bawipa Jesuh Khrih hrimhrim nih a chimmi cu “Keimah a ka ṭanhlo mi cu a ka raltu an si, pumhkhawmh a ka bawmlo mi cu ṭhektu an si” (Mt. 12:30) tiah a rak ti. Cuti a chim tikah Jesuh Khrih cu Thiang Thlarau Pathian thawngin Pathian caah miphun hna kha a pumhkhawmh hna i, cheuhnal ternak, ṭhekdarhnak, bu ṭhennak cu Pathian rianṭuan le Pathian duhnak asilo tiah cawnpiak asi.

          Thiang Thlarau Pathian cu minung bantukin ṭhencheunak hna sal asimi Bawipa asilo. Minung hna i ṭhencheunak hna, thleidan richiahnak hna le a dangte sinak hna vialte kha pakhatte pumkhatte sinak ah a pumhkhawmh tertu Bawi asi. Zeitindah asi kan tiah cun, Thiang Thlarau Pathian pakhatte cu veel laksawng phunphun kha mi pakhat cio nih cove hna seh tiah a duh bangin a ṭhenhcheuh cio hna (1Kor. 12:4, 11). Zumtu pakhat cio nih kan comi veel laksawng phunphun hna cu bu ṭhennak, bu cheunak hna caah asilo. Mi pakhat pumpak ngeihmi bantukin mah duhnak ningin tuahawk ca zongah asi fawnlo. Khrih pum asimi Bupi sak dingah asi (Efs. 4:11-12). Cuticun zumtu vialte hna cu “Kan zumhnak le Pathian Fapa kan hngalhnak ahkhan kan i fonhdih lai; nutling patling kan si lai i Khrih tlinnak a sanning taktak zong kha kan phan ve lai (Efs. 4:13).