Lungpuam ruamkainak

LUNGPUAM RUAMKAINAK KHA HNON I TUAHKEL TUAH A HERHNAK

1. Minung timi cu chuahkehnak kokek ningtein bia kherh hlai ^{2 Aristotle i metaphysic} a duh cio mi an si. Sihmanhsehlaw, Pathian `tihzahnak a umlo ahcun theihhngalh fimnak hna cu zei san dah a tlaih kun lai?
    Ahmaan ning incun, a dikmi mah `thathnemnak kha zeirello  hnon i, van arfi hna kha hmuhchih in a hlatmi thiamsang minthang mi nakin, Pathian rian a `tuanmi sifak khuate fa cu a `tha a thiang deuh.
    Mah konglam ahmaan ningin a hmuhtheih thiammi cu, amah pum kha a huat. Midang i thang`thatnak zong a duhlo.
    Vawlei cungah thiamtlak hngalhtlak mi vialte kha a theih hngalhdih ko nain dawtnak a karhter khawhlo ahcun ^{3 1Korin. 13:2} kha mifim thiam cu, Pathian mithmai ah zei santlaihnak dah a hmuhkhawh lai? Aruang cu, Pathian cu kannih kan tuahsernak cung lawng zohin bia a kan ceih.

2. Lung rangtuk in theihduh thiam duhnak kha ngol. Zeicah tiah mah lung rannak cu vaihvuannak, zumhnak pialnak hna asi ter.
    Ca lei a thiammi hna tu cu, fimthiam mi tiah minlangh an cuh. Thiamsang tiah kawhnak hna zongah an i nuam i an lung di a riam `theo.
    `Thatnak tlawmte lawng a pekmi, asiloah santlai baklo mi fimthiamnak hna cu, tampi an umve.
    Luatnak hmuhnak kha a bawmhchanh mi kongkau hna kha zeirello i, a dang kongkau ah a zuangzam mi hna cu a fimmi sinak a tlawmmi an si.
    Bia tampi chimnakin nihchuak capo ah lungtlinnak a umlo. `Thatein ziakel tuah lengmangnak lawng nih thinlung a dai. Thinlung thiangte ngeihnak, sual tuahlonak cu, Pathian hmai ah luh ngamhnak lungthin a pek.

3. Zuam chinchin i, a thianghlim mi ziaza huham kha, na ruahkhun ahcun, kha thleidan biachah khawh ding a let tamdeuh in a har telai.
    Cu asicaah nangmah cu `thate thiamnak pakhat, asiloah fimnak daal pakhat ah tlam a tlingcang tiah i uah hlah! Cuti na thiamnak ruangah pei khuaruat na `tih na thinphang ding a si cu.
    Nangmah cu `tuan awk rian tampi kha ka hngalh ka theih tiah ruahnak na ngeih siahcun aa hngalhtheih rihlo mi  `tuan awk rian hna tampiin a umrih tiah ruat. Ruamkai hlah. Ka hngalh ka theih rih lo mi tampi a um timi lawnglawng kha a hleice in ralring. 
    Vawlei cung ahhin nangmah nakin fimthiamnak a tlinh a sangdeuh i upadi kha `thatein a theih a thiam deuhmi tampi an umko nain, nangmah cu zeicah nangmah le nangmah thang`that na duh kun?
    Nangmah cu na caah a `thathnem ding mi fimnak hmuh na duh ahcun, fiang setsai lomi nih theihlo mi nunnak siseh, nangmah kha man ngeilo tiah mi tampi nih zohchuknak kha siseh na duh na tlaihchan ding asi.
    Nangmah pumpak kha ahmaan ning tein naa hmuh lai i, zohchuk sualphawt khawhnak cu a thiang upattlak asi i `thathnemnak tampi a chuahter mi cawnnak asi.
    Mah le mah a sang ah i chiahlo in, midang lawng kha zungzal in an `ha tiah siseh, hmaihngalpi awk asi tiah siseh, thinlung put ngeih cu a hleice mifimnak asi i, huham tlingmi sinak kha an hmuh.
    Mi pakhat cu fiangtein palhnak kha siseh, a rit a ngan mi sualnak a tuahmi kha na hmuh caah siseh, keimah cu amah nakin ka `tha deuh rih tiah i ruah hlah, zeicahtiah nangmah cu zeitk caan tiang dah sualnak tuahloin ka hmunkhawh lai timi kha na hngalhlo caah asi.
    Minung cu ningkel loin a um thiammi lawngte an si. Nangmah le mah tucu midang nak a hlei in tlamtling lomi ka si titu in naa cinken hrimhrim awk asi.