Lungput ning

“Jesuh cu a rak tlonlennak Nazareth khua ah khan a va kal i Sabbath ni ah cun hmasa i a rak tuah tawn bantuk khan pumhnak inn ah a kal.”(4:16)

“An tho i Jesuh cu khualeng ah an hnuh i lungpang cungin thlak awkah, khua a ṭhutnak tlang a par ah khan an kalpi.”(Lk 4:29)

Na hawikom siseh, na pawngkam um na theih hngalhmi pakhat khat si hna seh, awngminnak an hmuhmi cungah nahchuahnak lungthin na ngei bal maw?

Pakhat khat nih kanmah nak in hlawhtlinnak an ngeih tikah an awngminnak cungah cohlaan khawh dih cikcek timi hi cu minung pakhat caah a har ngaimi thil pakhat zong a si. Cohlaan khawh ning a tlawm-tam aa lo lai lo, aa dang ko lai. Abikin an sining kan theih hngalh tukmi hna nih hi bantuk thil an ton tikah hin a har deuh kho tawn mi a si. I zumh lo phun in le an van a ṭhat ruangah a si tibantuk in biachim zong kan hmang kho men lai.

Jesuh Khrih zong a rak tlawn lennak le a rak ṭhannak Nazareth khua a phanh tikah a rak thei hngaltu hna nih an rak cohlang duh ve lo. Zeicahtiah cun Nazareth khua chung ummi hna nak in fimnak lei in siseh, theih hngalhnak lei in siseh, chimphuannak lei in siseh a thiam, a hngalh deuh caah a si. Cun hitin a thiam ruang zongah hin a konglam a rak thei tu a khua mi hna nih an i zumh kho lo i an rak cohlaang kho lo; nahchuahnak lungthin an rak ngeih caah a si.  

Cutikah Jesuh Khrih cu an caah ral bantuk a hung si tikah a khuami lila nih thah ding tiangin timh nak an rak ngei. Hihi minung sining ah a chiabik mi le a ṭhalo bikmi lungthin a si ko. Zei ruangah dah minung hna nih hin kanmah nak in thil a ti kho deuhmi hna cungah hin nahchuahnak lungput kan ngeih hna hnga? A ruang cu ruam kainak lungthin le porhlawnak lungthin kan ngeih caah a si ko.

Porhlawt-ruamkainak lungthin le nahchuahnak lungthin hna nih hin zeitikhmanh ah ṭhatnak a kan pe bal lai lo. Tumchuk nak le thihnak lei tu ah a kan panther ko lai. Hi bantuk ruahnak ṭhatlo hna in khan kan lungthin kan uk ter sual a si ah cun zeitikhmanh ah kan cungah ṭhatnak an chuak kho bal lai lo.

Porhlawt-ruamkainak lungthin hna le nahchuahnak lungthin hna cu Jesuh Khrih cawnpiak nak phunglam hna he aa pialkalhmi an si caah hrial ding le hlawt ding hrimhrim an si.