Lungrualnak nih Khuaruahhar thil a chuahter khawh

Photo Credit

Cu lioah cun mi pali nih a zengmipa pakhat kha an rak zawnh. Asinain mi an tam tuk caah Jesuh sin kha an phakpi kho lo. Cucaah Jesuh cung zawn inncung kha an bauh i mipa cu a ihphah cung i a ih bu khan an vun thlak. Jesuh nih an ka bochan hringhran ti kha a hmuh tikah, “Ka fa, na sualnak cu kan ngaihthiam,” tiah mizengpa cu a ti. (Mk 2:3-5)

Mi pali hna nih rualrem tein thil an tuahser nak thawngin a zengmi pa nih damnak a hmuh ṭhannak kong kha nihin ni caah Bupi nih ruah ṭi dingin le thazang lak ṭi dingin a kan thimpiakmi cathiang a si (Mk 2: 1-12). Rualrem tein rian ṭuanṭi cu teinak hmuhnak a si timi zong nihin Missa thawinak chungah kan rel mi thawngṭhabia nih a langhter fawn. 

A zengmi pa nih damnak a hmuh ṭhannak hnga ding caah mi pali hna nih an zumhnak le an dawtnak he an tuahser piakmi kha Jesuh nih cun fiang tein a hmuh khawh dih ko. Hi mi pali hna nih a zengmi pa hawikom, asiloah chungkhar hna chung zongin si khawh a si. sihmahsehlaw abikin a langhter duhmi cu “midang hna thawngin; pakhat le pakhat thlacam piaknak thawngin damnak, sual ngaihthiamnak hmuh khawh a si” timi kha a si. Jesuh nih an ka bochan hringhran ti kha a hmuh tikah, “Ka fa, na sualnak cu kan ngaihthiam,” tiah mizengpa cu a ti (Mk 2:5). 

Jesuh tuahsermi khuaruahharnak nih hin a langhtermi pathum a um. 1) Pathian kan i bochan a si ahcun kan i ruahchanmi nak in a let in Bawipa nih thlua a kan chuah ko. 2) Pakhat le pakhat kan sualnak kan i ngeihthiamnak nih damnak a kan pek; sual ngaihthiamnak cu Pathian he i pehtlaih ṭhannak hnga ding caah a si. Pa Pathian sin phanh khawhnak hnga ding caah Jesuh nih kan thian lonak hna khan a thar in a kan thianhpiak ṭhan cang. 3) Bawipa Jesuh mithmai cungah dawtnak, zangfah thiamnak le zawnruah piak thiamnak lawng te in a khat zungzal ko.

A tawinak in kan chim a si ah cun, lungthin thlennak, damnak le khuaruahhar thil kan hmuhmi vialte hna hi Pathian dawtnak le zaangfahnak thawng lawngin an si dih ko hna.  

 

Add new comment

3 + 0 =