Lungsaunak

Photo Credit

 

Minung kan nunnak ah hin harsatnak, hneksak nak le tlamtlin lo nak hna hi ton cio mi a si. Hi hneksak nak hna hi kan tei khawh, kan lawnh khawh tikah cun vel le thluachuahnak hna nih a kan don tawn. Izip ram lei a kal mi thilzuar hna sin ah Joseph cu a u le nih an rak zuar. Kum (13) a si hnu, harsatnak le hneksak nak hna a ton dih tik ah Joseph cu Pathian nih thlua a chuah i Izip ram ah nawl ngebik mi a pahnih nak a hung si. Cu cu Joseph nih Pathian cungah a zumh tlak tein le a tuah mi hna cungah felfai nak a ngeih ruangah a si. Kan nih hna zong kan harsat nak hna le hneksak nak kan ton mi hna kan tei tikah cun Bawipa Pathian nih thiltha kan caah a kan chiah piak ko lai.

Harsat nak le hneksak nak kan ti tik zongah hin kan mah lei in kan hrial hnga ding mi zong an um len ve. Mah zawn lawng ruahnak, lungkhonnak le ruamkai nak tibantuk hna ruangah harsatnak le hneksak nak hna zong an um thiam. Bawipa nih a kan pek mi vel le a thluachuah hna cungah ah kan lungkhon, kan ruam a kai a si ah cun Pathian duh lo mi lam pingah a pial mi kan si ko lai. That lo nak kha that lo nak in lehrulh tibantuk hna hi thil tha lo an si. Pathian vel le thluachuah co a duh mi kan si ah cun a kan timh piak mi hna cungah kan lung a sau a hau. Biana ah, sianginn a kai ka mi ngakchia nih college direct in kai khawh a si bal lo. Duhsah tein thiam cawnnak a dotdot in a kai hmasat a hau.

Pathian nih a Profet hna a rak thlah hna, an rak cohlang duh hna lo. A Fapa dawt a rak thlah tik zongah an rak cohlang duh lo. Hi vialte hna hi lungkhon ruangah le ruamkai ruangah an si. Dawtmi u le nau hna, Bawipa nih a kan pek mi caan tawite chung ah hin kan lung innka lianpi in hung hna u sih law, Bawipa duh mi kha cohlang thiam zungzal hna u sih.

Add new comment

6 + 2 =