Lungthin hi remh ding a si ko

“Leithuahnak in lei tuah hram thawk hi a har deuh” ti a si. Leikuang pakhat an chaih tikah thinghram hna le lung a um mi vialte chuah dih a hau tawn. Leikuang thar ah lei an thuan tikah a hram thawh ka ah cun chuah ding philh sual mi lung zong tam ngai a hung chuak tthiamtthiam kho rih. Cun ngaidi siseh, belh phunphun zong an hung keo kho rih. Kum sau nawn thuan hnu le remh hnu lawngah facang chuah a ttha mi leikuang ah a hung cang.

Jesuh Khrih cawnpiak mi thlaici vorhtu bianabia(Matt 13:18-23) hi lei a thuang mi hna caah cun i fian a fawi ngai mi cawnpiak nak a si ko. Leithuan tikah dawn khaantu lung le belh an um lo hrimhrim a herh bangin, facang chuah a tthatnak hnga ding caah non tthatnak hmun siding zong a herh. Pathian bia cu thlaici bantuk a si. Vawlei a tthatnak (leikuang tthatnak) timi cu kan lungthin hi a si ko i kan thinlung vawlei (leikuang) ttha tein kan remh a si ah cun Pathian bia cu kan chungah ttha ngai in a tthang lai i a nung ko lai.

Kan lungthin leikuang a kan thuan piaktu ding le a kan remh piaktu dingah Thiang Thlarau Pathian kan sawm zungzal ding hi a herh mi a si. Pathian bia thiang “Bible” cu Thiang Thlarau lam hmuhsak nak thawngin ttialmi an si caah Thiang Thlarau Pathian bomhnak kan hal lo a si ah cun zei ti hmanh in theih khawh ding le i fian khawh ding a si lo. Cuasicaah, Bible thiang kan rel hlaan ah Thiang Thlarau Pathian kan sawm hmasat zungzal ding a si.

Thiang Thlarau Pathian nih kan lungthin “leikuang” a kan serpiak a si ah cun Bible cathiang kan rel mi a sullam hna zong kan i fiang kho hna lai i Pathian bia a kan cawnpiak tu hna cawnpiak mi hna zong ttha tein kan cohlaan khawh ko hna lai.