Lungthin Ttha le tthalo

Genesis – 4:1-15, 25

Mark – 8:11-13

• Nihin avoi(1) nak kan theih mi cathiang chung kan zoh tikah, Cain le Abel hna nih Pathian sin raithawinak an tuah tikah Bawipa Pathian nih Abel raithawinak a cohlan piak tikah Cain a thin a hung i a nau Abel a thah nak kong a si.
• Cun kan hmuh tthan mi cu Bawipa nih raithawinak a cohlaan tikah meikhu dik tein van ah a kai tiin kan hmuh fawn. Hi konglam hi kan ruah a si ah cun Bawipa nih lungthin dik tein le lungthin tak tein pekchanhnak a cohlaan timi hi a si. Cain raithawinak meikhu cu vawlei ah aa zel ee a ti. Pathian sin phanh lo in vawlei ah aa zel. Lungthin tha loin pekchanh mi meikhu a si.
• Pharasee mi hna zong nih Bawipa tuah sernak, mizaw a damter hna zongah siseh, mitcaw a damter hna zongah siseh, thlarau tthalo nih a tuah mi hna zong damnak a pek tik hna zongah siseh,… zeitik hmanh ah tuahsernak ttha ah an cohlang kho bal ve lo. Van lei in khuaruahhar nak pakhat khat tuah ding tu ah an fial, an hneksak kong kan hmuh. Lungthin tthalo in a zoh i a ngia leng mang tu hna an si. An lungthin Bawipa nih a cohlang duh ve lo. Cutikah “Jesuh cu fak piin a hrum”tiah a ti (Mark 8:12). Hi hrum nak cu Bawipa ngaihchiat nak a langhnak zong a si. Bawipa a ngaihchiatter tu kan si ve hna maw?
• Thil ttha thil hmaan a si mi cohlaan duh lo cu “Thiang Thlarau Pathian cohlaan duh lo asi”.
• Bupi a dik mi theih ko zongah a cohlang duh lo mi hna he bia el nak tuah leng mang zong hi santlai lo mi thil a si. Bawipa nih zeibantuk lehnak hmanh tuah lo in a lawng a hrum hnawh hna bantukin an ca tu ah thlacam piak ding an si. Lungthin a thleng kho tu cu Pathian pakhat lawng a si caah, Pathian sin ah ap piak hna u sih.
• Ram le miphun caah tthat nak a chuah pi tu le tthat lo nak a chuah pi kho tu thil a si mi cungah i theih ter duh lo in lungpuar in a um mi hna ca zongah thla cam piak zungzal hna u sih.
• Hmanungbik ni ah “Lam le Biatak le Nunnak”(Jn14:6) a si mi Bawipa nih zeizong vialte a tei bantukin nikhat a hmaan mi le a dik mi nih teinak a kan pek te ko lai.