Lungthin zohtu Pathian

Photo Credit

A thianghlim mi sinak nih hin Pathian he a kan lawhter i sualnak le palhnak nih hin satan he a kan lawhter. Minung sining in vun ruat than hmanh hna u sih law, thianghlim tein kan um khawh zungzal a si ah cun kan ngan zong a dam i midang hna he tonbiaruahnak hna zongah mithmai hmuh khawh deuh a si.

Biaknak lei in thianhlimnak kan ti tik zongah minung pakhat a umtu ning, a khuaruah ning, a chimrel ning, a tuahser ning, tbk . . . vialte tthatnak a chuahter kho mi le thluachauh phurtu, lunglawmhnak a chuahter khotu sining vialte aa tel dih.

Kan Pathian cu a thianghlimmi Pathian a si caah kan biak i kan thangthat; a kan cawnpiakmi vialte hna cungah upatnak lungthin he zulh khawh kan i zuam zungzal. Zeicah kan ti a si ah cun kan caah thatnak a kan tuah piak zungzal tu a si caah a si.

Jesuh Khrih nih a kan cawnpiak mi vialte hna zong a thianghlim mi lawng te an si dih hna i kan thlarau khamhnak a co khawh nak hnga ding caah lam hmaan a kan hmuhsak tu lawng te an si. Jesuh Khrih cu minung sining in a rak chuak i kanmah hna bangin minung sinak le harsatnak a rak ingtuar bal ve mi a rak si. Minung hna nih zulh khawh lo dingmi thil zeitik hmanh a kan cawnpiak bal lo.

(Matthew 11:16-19) chungah Jesuh Khrih nih ruahnak thalo lungput he a rak ngiar zungzal tu Farasi mi hna kha “Pathian duh mi tuah timi cu zei dah a si” timi kha fiang tein a rak hmuh sak hna. “Bawipa nih minung ruahnak cu ka dah dih i an lungthin cu ka zet dih, an tuahnak nih a phut ningin le an ziaza ning cio in ka cham hna” (Jeremiah 17:10).

Kan Lai phungbia ah “chungthu lengnaal” timi a um. Farasi mi hna le cawnpiaktu saya tampi nih cun hnipuan thatha an rak i hrukaih ko nain an lungthin a thian lo caah Jesuh Khrih kha “Pathian Fapa a si, Messiah a si” timi an rak hmu kho lo. “Lungthin a thiangmi cu lunglawmmi nan va si dah! Pathian kha nan hmuh lai”(Matt 5:8) tiah Jesuh Khrih nih a kan cawnpiak. Jesuh Khrih cawnpiak mi le a hruainak lam ah a zul kho tu hna, Pathian Fapa a si tiah a zum kho tu hna cu lungthin thiang a ngeimi lawng an si caah a thianghlimmi nun zia in nun khawh i zuam zungzal hna u sih.

Bawipa nih Samuel sinah cun, “A muisam in siseh, a pumrua in siseh, zoh hlah, zeicahtiah amah cu ka hlawt cang; zeitintiah Bawipa nih cun mi I an zohning in a zoh lo; mi nih cun lenglei langhning kha an zoh, sihmahsehlwa Bawipa nih cun lungthin kha a zoh” (1Samuel 16:7)tiah a ti.

Add new comment

18 + 2 =