LUNGTHLEN IN KHUAL TLAWNG USIH

Photo Credit

            Khuacaan nih a sining in aa thlen lio ah, kum zong nih a hlun thliahmah.. Pangpar hna zong pakhat a ttil hnah thar pawl an cawrh. Sining le thlen ning an langhter cio. Athar, a thar leiah kaar an hlaang cio. Hi hna hi leicung thil sining a hlunhnak le a tharnak sining lawngte an si.

            Asi ahcun, kannih vialte zonghi mah i thlennak lam cung ah aa chokmi lawngte kan va si i zei bantuk thlennak dah kan lonh cang. Minung tiah vawlei cung kan rak luh ka in, hngalh thiamnak kan rak ngeih ka in, ngakchia, mino in upa ti in i thlennak kan tong cio ko lo maw? Hi bantuk thlennak hi cu pumsa thlennak kan ti khawh ko. Hi bantuk pumsa thlennak a lonh thluahmah mi kan nih hna hi lungthin lei thlennak ah kan cu zaa kan fek kho cang maw? Nikhat hnu nikhat kan kum lawng a tthang i lungthin lei ah kan ngakchia tuk rih da ra. Ngakchia bantuk in "Si duhnak" lawng kha papek in si a herhmi siding papek kan philh sual tawn maw? Asiloah hramhram in i chit in kan duhnak lawng hi a dik a hman mi thlennak lei a hoih maw ti hi mah le mah i chek hlat a hau cang.

            Kan hmet lio nak in midang cungah theihthiamnak kan ngei deuh cang maw, bawmhnak, zangfahnak te hna kan ngei deuh maw, hawi dang caah tiin `hatnak kan tuah khawh pah cang maw? Siannak lungthin te hna kan ngei pah cang maw. Hi vialte "maw" hi kan tlinh le tlinh lo mah le mah i chek kan hau cang.

            Pathian fa kan si bantuk in Khrih lungput ngeih ding ah kan cinh, kan zulh khawh lawngah Pathian fa taktak a dik a hmaanmi kan si lai. Nikhat a liam fate kaar kan hlaan mi cu pumsa a dih donghnak lei thlaan hmun leiah kan kal thluahmah ti hi hngalh zungzal a hau. Nikhat khat cu hi vawlei cung in ka chuak lai ti a hngal pengmi kannih vialte nih zeitik caan poh ah ka kal kho ti kha hngalh tthan in a dik a hmaanmi i thlennak ni le caan kha kan sersiam awk a si cang. Kan pumsa caah a herhmi ti rawl vitamin kan ei din bantuk in thlarau lei ca zong ah nifatin kan tonmi harnak phunzakip caah thlacamnak in thazang i laak kan hau. Zungzal in kan duh a tling kho lai ti duhnak a si lo. Zuamnak kan ngeih a hau.

            Minung kan si bantuk in kan nun chungah minmei nih maw dihlak in a khuh chel le ruahpi a han i ni a tlaan caan ti hi kan tong cio ko lai. Minung sining bantuk in thinhun, aipuan, thangchiat, ceihphai, mawhchiat ti bantuk te hna hi kan nun chungah hrial awk a ttha lo mi hna an rak si. Asinain hi hna hi kan zia ah a can lo ding a biapi tuk. Hi bantuk ziaza hna kan rak ngeih sual ahcun, zawrter deuh, tthumh deuh kan i zuam ahau lai. A zapi kan hlawt khawh lo hmanh ah ni nikhat a liam fa te zia tthalo pakhat te tal cu hlawt khawh a hau. Hakkauhnak he kan nun caah kan sining in nun khawh lo, thintawinak he kan nun caah piahtana phun zakip khawntthek a laami sinak, duhfahnak he kan nun caah hna a ngam kho lo mi nunnak ti bantuk ... hi bantuk thil a si mi hi duhnak lungthin lawng kan zulh caah a si. Keimah lawnghi a dikbik a hmanbik ka si tiah kan i ruah sual tawn. Mi kong ceih cu kan duh ngai nain kan kong an kan ceih cun kan duh hrimhrim lo. Midang mawhchiat cu kan thiamngai i kanmah tu cu fak lawng kan duh. Hi bantuk thil a cangmi hi mah le mah i hngalh lo, hngalh ding zong i zuam lo ruang ah a rak si.

            Keimah ruangah a ngaih a chiami hna, ruahchannak a dongmi  hna, zeizat dah an um cang, ka bia kaa khat ruangah midang ruamam a tlak tertu biafang voi zeizat dah ka chim cang ti kha, vun kawl `han lengmang a hau.

            Na ziaza a tthalo mi pawl na vun kawl khawh ahcun na thinlung chungah i thlennak a rak sem cang lai. Mah le mah i hngalh hi a biapi tuk hringhran. Hi bantuk hna hi kan nunnak a kan thlenpiak tu lam a rak si. I thlennak lungthin kan chung a rak luh ah khan cun kanmah le kanmah kan i hngal cang tinak a si. Hmanungbik kan i tinhmi cu, vancung ram a si awk a si. Vancung ram minung si khawh awkah vanram kalnak lehhmah (Visa) hmuh khawh ding i zuam a hau. Vancung ram kalnak lehhmah cu kan nun chung kan ziaza thil`ha kan tuah mi pawl hi a rak si ko.

            Nihin in thaizing ah a thleng mi caan ah a nungmi kannih vialte hi dawhngai in aa thlengmi THAIZING chung luh khawhnak caah kan lungthin vialte kha vun remh cang u si. Zungzal a hmun hnga dingmi kan thlarau caah vanlei cuanh in, ni fatin thlennak pangpar dawh te i tonh in kan nunchung dawtnak he vanram lei khual tlawnnak ah i thawh cang usih.

Add new comment

5 + 10 =