MARY MAGDALENE

 

July, 22

ST. MARY MAGDALENE

(Kum zabu 1)

            Mithiang Maria Madalena cu Martha le Lazaruh hna i an nau a si i sualtuahnak in a min a rak thang mi, khuachia pa 7 nih an tlaih mi asi (Lk; 8:2). Judah ram Bethany khuate in asi nan Galilee um Madala ah a zia aa thlen hnu ah Madalena tiah minih an theih mi a si. Jesuh nih Farasi pakhat a simi Simon inn ah zanriah a ei lioah Maria nih Jesuh ke kha a mit thli in a `awlpiak i Zihmui a toihpiak. Mah tuahsernak cu Simon caah intuar khawhnak nakin a lonh deuh nain Jesuh nih “Mahnak i a sualnak tampi kha a ngeihthiam caah tampi in kan dawt” tiah a rak ti. Cu hnu thawkin Maria cu Bawi Jesuh zultu hna caah a herhbaumi a `uanpiaktu nubu ah a tel ve. Nikhat cu Jesuh nih Bethany i Lazaruh inn ah a va len tikah Maria cu inn rian`uan loin Jesuh kehram ah a `hu i a bia kha a ngaih caah a u nu Martha nih Bawi Jesuh sinah a chim. Asinain Bawi Jesuh nih, “Martha, Martha, nangcu zeizong thil kongah na thin a phang. A herh mi cu pakhat lawng a si. Maria tu nihcun thil`ha kha aa thim cang. Mah thil cu ahohmanh nih an chut kho ti lai lo” tiah a ti (Lk; 10:41-42).

            Harsatnak a in lai ni (6) aa duh ah khan Jesuh cu Bethany khua Lazaruh inn ah a va leng i Maria Madelena nih a ke kha Naaduh zihmui in a toih`han. Judah Isakariot cu mah bantuk a man a fakmi zihmuih a laak a siter kha a ing kho lo i, “Mah zihmui kha zuar in mi sifak hna kha pek ah a `ha deuh lo maw?” tiah a rak ti. Asinain Jesuh nih “Amah cu hnahnawhnak pe hlah u, ka ruak vui ni caah a ngeih mi cu i chiah ko seh. Mi sifak cu nan sinah an um zungzal ko lai, Kei cu nan sinah ka um zungzal lai lo” tiah ati (Jn; 12:7-8). Ni sarihnak a nikhat ni zingka ah Maria Madelena le a dang nu hna cu ruak um loin a lawng mi thlankhor kha an va hmuh. Cu tikah Vancung mi pahnih nih “mithi umnak ah a nung mi kha zeicahdah nan kawl” Amah cu hika ah a um ti lo, A tho `han cang” tiah an rak chimh hna. Cu hnu ahcun Jesuh nih Maria sinah a lang i “Maw Minu zeicahdah na `ah?” tiah a hal. Amah nih cun Dum cawngtu nih a ka hal tiah a ruah caah ka Bawipa ruak khoika ah an chiah tiah a hal. Jesuh nih amah nu i a min in a auh tik lawngah Jesuh a si kha a hngalh i a kuh. Jesuh nih “Keimah kha ka kup rih hlah, Kei cu ka Pa sin ah ka kal rih lo. Ka nau le sinah vakal hmasa law ka Pa a simi nannih nan pa, Ka Pathian a simi nannih nan Pathian sinah ka kal lai nak kong kha va chim rih hna” tiah a ti (Jn; 20:11-18).

Add new comment

13 + 4 =