Mei

Jesuh Khrih cu daihnak siangpahrang a si tiin kan Bible cathiang chung hmun tampi ah kan hmuh khawh. Sihmanhsehlaw, nihin ni caah Bupi nih a kan thimpiakmi cathiang Luke 12: 49-53 chungah Jesuh nih zei ruangah dah, “Vawlei hi mei in duah awkah pei ka rat cu, alh hluahmah cang seh law ka hei duh dah!” tiah a ti hnga? 

Kan Bible thiang chungah “Mei” timi biafang hman a si tikah a chim duhmi le a sawh duh mi cu misual mi hna cungah Pathian thinhunnak langhternak timi ah hman a si kha kan hmuh khawh. Jesuh nih “Mei” tiah a hmanmi bia zong hi hlaan prophets hna nih Israel mi hna cungah Pathian thinhunnak langhter nak caah an rak hmaan mi bia zong a si . (Jeremiah 15:14, Ṭahnak Hla 4:11-13, Ezekiel 20:47-48, Joel 2:1-3, Amos 2:4-5, Malachi 4:1, Biathlam 20:9). Jesuh nih “Mei” tiah a timi hi misual mi hna cungah tlunter a si hnga dingmi Pathian dantatnak kha a langhter duh caah a si. 

Jesuh Khrih nih hin kan chungkhar cio ah siseh, hawikom hna kar lakah siseh “Ṭhennak Mei” a chuahter taktak ko. Sualpalhnak le thil ṭha lo chungah kan tlak sual nak hnga lo ding caah cun Jesuh Khrih nih kan kar lak ah ṭhennak a chuah ding hi a ṭih nemmam lo. Ṭhennak a chuahter thluahmah ko lai. Bianabia ah innchungkhar chungah a ummi pakhatkhat nih “Chimh a ngeih lo tikah” siseh, palhnak lam a zulh sual tikah zeitin dah kan um cio hna hnga? Kan um sawh, kan zoh sawh ko hna lai maw, kan cawnpiak hna lai dah? Jesuh zong nih kan rawh lai ding hi a duh lo. Kan lungthin aa thlen ṭhan i Amah Pathian sinah kan panh ṭhan ding hi a duh zungzal mi a si ko. 

Jesuh Khrih cu mi vialte khamh kan si nak hnga ding caah a rak ra taktak ko (Jn 3:16-17). Sihmanhsehlaw a thawngṭhabia a cohlaang duh lo mi hna caah cun an cohlaan duh lo/ an hlawt caah zungzal nunnak caah ruahchan awk zeihmanh a um lo. Avoi (2) nak a rat ṭhan tikah amah a cohlaang duh lomi hna le a hlaw mi vialte hna kha zungzal rawhralnak mei chungah paih/ thlak an si ko lai.