Mi nih aho an kan ti dah?

Voikhat Bible relnak    -  1 Peter 5:1-4

Thawngtha bia relnak  -   Matthew 16:13-19

Mi nih Mi Fapa hi aho a si, a kan ti dah? (Matt 16:13)

                Kan Bawipa Jesuh Khrih nih kan mah pakhat cio a kan hal mi bia a si. Kan caah Jesuh Khrih cu ahodah a si hnga? Bawipa a nun lio ah mipi nih an hmuh ning a rak i dang cio. Micheu nih tipil petu Johan, Elijah, Jeremiah a si lo ah prophet pakhat khat a si an ti. Kan hmuh ning ah hin tah Bawipa cu ahodah a si ve hnga? Bawipa Jesuh cu kan nunnak ah lam a kan hmuh sak tu le ceunak a kan petu le a kan khamh tu Pathian Fapa ngaihchun a si ko. Kan nun lam ah harsatnak kan ton tikah ceunak a kan petu, lam hmaan in kan pial sual tik ah lam dingah a kan hruaitu le a kan bawmchan zungzal tu a si.

                Nifatin kan nunnak ah kan pawng te ah a um i kan ngaih a chiat tik ah a kan hnem tu a si. Zawtfahnak kan ton tikah damnak a kan pet u le tukforhnak kan ton tikah teinak thazang a kan pe tu a si. Pathian Fapa hrimhrim a si ko na in kan sinah a rungtum i kan mah bantukin vawlei mi nunnak aa hrawm mi le kan ton cio mi harsatnak hna zong a thei hngal dih tu zong a si fawn.

                Bibile thiang chungah kan hmuh mi cu thlarau tha lo hna nih an tuah mi hna zong damnak a pek than hna i a tling mi minung dirhmun in a tuah piak tu, a zeng mi hna le mitcaw mi hna zong a damter tu, thinghmui mi hna zong damnak a pe than tu le a cawnpiak mi thawngtha bia a ngai mi hna zong nih zungzal nunnak an hmuh khawh nak hnga ding caah lam a hmuh sak tu a si. Jesuh Khrih cu zeizong vialte a tuah kho tu, kan damnak le kan khamhnak a si mi Pathian Fapa, messiah a si. Zeicah kan ti a si ah cun: “Jesuh Khrih cu Pathian hmual le Pathian fimnak a si” caah a si (1 Cor 1:24).