Midang caah Thla kan cam

January 29, 2020 (Thursday)

Hakha RVA in thawgṭha a ngaitu Khrih ah dawtmi nu le pa, u le nau hna, Pathian nih thlua in chuah hna se law, ṭhat lonak vialte chungin in khamh ko hna seh. Nihin January 29, 2021 i kan relhnga mi Gospel cu Marka 4: 26-34 tiang a si i Bawi Jesuh nih Pathian Pennak he pehtlaih in ‘a ṭhangmi thlaici bianabia’ le ‘anṭam ci bianabia’ a chimnak kong asi. Thawngṭha Bia relnak kan ngei ta rih lai.

Marka 4:26-34

Jesuh nih, “Pathian Pennak cu hi bantuk hi a si: Mipa pakhat nih thlaici kha a lo ah a tuh. Zan ah a it, zing ah a tho i rian a ṭuan i cu chung vialte ah khan thlaici cu an rak keuh i an rak ṭhang, sihmanhsehlaw zeitindah cuticun an si ti kha cu a hngal lo. Vawlei nih khan thlai kheu cu a ṭhanter hna i thei a tlaiter hna, a hmasa bik ah a hnah zimno tete kha an hung chuak, cun an hung vui i an hung zaa. Cun an hung hmin tikah ṭuan caan a cut cang caah a ṭuantupa nih a facang hlehnak fa-ah in a hleh hna,” tiah a ti. 

 “Pathian Pennak cu zei he dah aa lo, kan ti lai? A sullam langhternak dingah zei tahchunhnak dah kan hman lai? Vawlei cung thlaici lak i a hme bikmi anṭam ci bantuk a si. Mi nih an i lak i vawlei ah an tuh; cun tlawmpal hnuah a hung ṭhang i thlaihring kung lak i a ngan bik ah a cang. A nge kha a ngan pipi an si caah vate kha an ra i a thladem ah bu kha an ser,” tiah a ti. Hi bantuk bianabia tampi kha hmang in, Jesuh nih an hngalh khawh tawk in, Pathian bia kha a chimh hna. Annih cu tahchunhnak hmang loin a chim hna lo, sihmanhsehlaw a zultu he lawng an um tikah cun zeizong vialte kha an sullam fiang tein a chimh hna.

(Bawipa Thawngṭha Bia a si.)

            Hi bianabia pahnih ah hin Pathian ih rian ṭuannak khuaruah har a si nak kan hmu kho. Kan rian ṭuannak ah minung lei nih kan tuah kho mi cu tlawnte lawng lawng a si i a tam dueh cu Pathian nih a kan tuah piak mi asi ti cu zumnak mit in kan zoh tikah kan hmu kho mi a si. Bianabia a pakhatnak ‘a ṭhangmi thlaici bianabia’ kha zoh hmasa nah u si. ‘Mipa pakhat nih thlaici kha a lo ah a tuh,’ i a tuh dih in khan zan ah a it, zing ah a tho i rian a ṭuan i cu chung vialte ah khan thlaici cu an rak keuh i an rak ṭhang, sihmanhsehlaw zeitindah cuticun an si ti kha cu a hngal lo ti a si.

Kan hmuh tawn mi le kan theih tawn mi a si caah thlaici kan tuh i vawlei a ṭha i ti zong ṭha te in kan toih asi ah cun a ṭhang lai i a kung ah a cang lai ti kha kan hngalh. Natein thlaici hme te in zeitin dah thingkung nganpi a chuak kho ti kha cu kan hngalh lo (kan hngalh mi cu ta-ba-wa a si ko ti hrawng kha a si). Cun ti cu kan toih natein a ṭhang ding in kha cu kan tuah kho lo. St. Paul nih 1 Kor 3:6 ah a chim bantuk kha a si. ‘Kei nih a ci ka tuh, Apollo nih a kung kha ti a toih, sihmanhselaw a ṭhantertu cu Pathian a si,’ tiah a ti. St. Paul nih a chimnak ah cun thlarau lei, zumhnak kong lei kha a chim mi a si. Natein kan ei hnga mi thlaici kan tuh tik zong ah mah ban tuk ṭhiamṭhiam a si. A ṭhan tertu cu Pathian a si.

Midang caah thla kan cam piak i an caah a dang zei hmanh kan tuah piak kho lo caan hman ah kan thlacamnak Pathian nih a ngai i rian a ṭuan a si ah cun bianabia chung i kan hmuh ban tukin kan hngil lio ah kan theih lo lio ah kan thlacam piak nak nih tam pi a bomh kho hna. Kan thlacamnak cu anṭam ci tia te ban tuk sihmanhsehlaw Pathian nih thluachuah a kan pe asi ah cun khuaruahhar thil a cang kho mi a si. Cun kan rian ṭuannak ah siseh, mi ca ih thil kan tuah piak mi zong siseh, a tlawmte a hmete anṭam ci tia te a si hman ah kan tuah mi a ṭha i dawtnak in kan tuah mi a si ah cun anṭam ci hmete nih anṭam kung nganpi a chuahpi ban tuk in a si ve te lai. A biapi mi cu zumnak ah siseh, thlacamnak ah siseh, kan rian ṭuannak ah siseh, a si kho lai lo ka tuah kho lai lo tibantuk in ruahnak ngei hmasa lo in a hme mi tete in asiloah a tlawm pal tete in ṭuan thok tuah thok ding kha a biapi ngai mi a si.

Tahchunnak ah St. Mother Theresa i nunnak asiloah a tuan bia kan zoh a siah cun kan hmu kho lai. A thok nak ah zei hmanh a ngei lo i a rian ṭuan duh mi zong zei hmanh lo te ban tuk a si. Anṭam ci tia bantuk te in a thok i a hnu ah cun vawlei cung hmun kip ah a rian ṭuannak cu a karh thluah mah. Zei dah a chuak te lai, zei dah ka ngah lai ti nak in kan tuah kho mi te kha zei hmanh lo ban tuk sihmansehlaw a ṭha cem in kan tuah a si ah cun Pathain nih a ṭha cem in lam a kan hruai lai i a kung ngan mi le a ṭha mi a rah zong tam pi kan hmu te lai. Bawipa nih a kan pek mi rian tete kha dawtnak he a tuah kho tu kan si nak lai zuam cio u si tiah forh kan duh hna.

Fr. Peter Lal Zin Thang (Hakha Diocese)