Midang kha va soi hna hlah, nangmah tahnakin bia zong va khiah piak hna hlah

Photo Credit

Saturday, August 20, 2022

Annih cu kanmah nakin, midang nakin an ṭhat deuh lo caah pei Pathian nih dan a tat hna cu (a thihter hna cu) tiah na ruat maw? “Cu (Galilee) mi hna cu midang hna nakin an sual deuh caah thihnak an ing (Covid nih a chawnh hna) tiah nan ruat maw? Asilo, kan ti hna. Nannih zong nan zia nan i ṭhinh lo ahcun anmah thih bantukin nan thi ve lai. (Luke 13:2-5) Athicia mi hna zei bantukin an va thih zongah Pathian remruat a si, A nung rih mi hna zia i ‘hinh ding le amah zumh deuh ding caah a si.
Khimi hna cu an sualtuk cu teh, khi tin an thih awk a si ko, tiin aa lawmmi hna caah... “Miṭhalomi thih cu maw ka duh? Aziaza kha aa remh i a nun kha ka duhmi a si deuh lo maw?” tiah Bawipa nih a ti. (Ezekiel 18:23) “Miṭhalo mi an thih cu ka duhmi a si lo. Miṭhalo mi nih an ziaza kha an ṭhinh i an nun kha ka duh deuh. (Ezekiel 33:11) Ruahding mi - Pathian a duh lomi, aa lawmh lomi rianah lunglawmh hi thilṭha a si kho lai maw?
Bible kan rel i kan ruah fate a dangmi lawng kha va hmuh colh, mawhphurh thiammi hna caah. “Zeica’h nang cu, Na mit chungah thingtan a um ko buin, na unau mit chung i a ummi mit hnawmte kha na zoh i in coih piakning na ti ngam? Mi depdepa, na mitchung i thingtan kha chuah hmasa law pei, na unau mithnawm cu fiang tein na hmuh lai i na coihpiak khawh lai cu!” (Mt 7:3,5) tiah ati.
Chambaunak ngeih ciocio (sualnak ngeih ciocio) midang kha (zawnruah siaherhnak in hei chimh bantuk) ningzah thleih a thiammi hna caah Pathian bia cu ; “Moses nawlbia ah...cubantuk mi cu lung in thilakin cheh hrimhrim awk a si lai, ti in a um. Bawipa, Nangtah zeitindah na ruah?...Bawipa cu vawlei ahkhan a kutdongin ca a ṭial lengmang. An hal chih lengmang caah dingte in a hungṭhu i, “Nan lak i sualnak a tuah bal lomi nih chep hmasabik seh,” tiah a hun ti. (Jn 8:5,7) Nannih cu biaceih in sual dantatnak nan innak hngalo, a dangmi kha biakhiahnak vatuah hlah u. Zeicahtiah mi cungah bia khiahnak na tuah (na soi) hna ning te khan Pathian na cungah a hman ve lai. Midang cungah tahnak na hmanning te khan a hman ve lai. (Mt 7:1-2) “A sangbik van ah khin Pathian cu sunparnak co ko seh, cun a dawtmi hna umnak vawlei ahhin daihnak um ko seh” (Lk 2:14).