Minung tinh mi le Pathian tinhpiak mi

Abraham nih a kut khat lei in mei le naam aa ken i a fapa dawt Isaac kha Pathian sin pekchanh dingin tlangcung a kai lio ah khan a thinlung chungah fahnak mei zeitluk in dah a linh hnga? A fapa Isaac zong nih amah khanghthawi nak ding caah thing tom aa put bangin khan kan Bawipa Jesuh Khrih zong nih minung vialte a kan tlanh nak hnga ding caah amah le mah thlawinak peknak ding vailam tung kha aa put ve.

Fapa ngeihchun Isaac Pathian sinah pekchanh tthan ding caah timh a si lio caan ah a nu Sarah zong zeitluk in dah a thinlung a kuai ve hnga? Abraham nih a fapa sinah: “Pathian nih khua a khan te ko lai, ka fapa”(Gen 22:8) tiah a ti tikah a fapa nih a pa cungah a zumhnak kan hmuh khawh. Mithiang Augustine nih: “Zumhnak timi cu mit nih a hmuh khawh lomi kha zumh a si i cu zumhnak nih cun hmuh khawh lomi kha a kan hmuh ter khawh” tiah a ti. Abraham le a fapa zong nih an zumh mi kha an hmuh khawh taktak.

Jesuh Khrih sinah zumhnak he a zeng mi pa a rak phortu hna an zumhnak kha Bawipa nih a hmuh tikah hawikom hna zumhnak thawngin a zengmi pa nih damnak a hmuh tthan (Matt 9:1-8).

Isaac thihnak in a khamh tu Pathian nih minung hna a kan dawtnak cu a Fapa Jesuh Khrih a kan pek nak in kan hmuh khawh(Rom5:8, 8:32). Mithiang Paul nih: “Mithmuh in si loin zumhnak tu in kan kal”(2Cor 5:7) tiah a ti bangin, Vancung ram lei hoih in khual kan tlawn nak ah zumhnak fek tein kal zungzal hna u sih.