Minutes 1 Thlacam

“Thla kan cam hna lai, minutes 1 lawng kan rau lai,” tiah kan ti hna sehlaw kan ni men ko lai. Minutes 1 te lawng thlacam cu a sullam zong a um lai lo tiah a ruatmi zong kan um kho men lai. Bawipa Jesuh cawnpiakmi thlacamnak (Lk 11:2-4) te kha duh sah tein cam hmanh. Minutes 1 pakhat hmanh na rau men lai lo. Hi thlacamnak te hi kan caah a tling tukmi thlacamnak te a si ko.  

“Bawipa, Johan nih a zultu hna a cawnpiak hna bangin kannih zong thlacam kan cawnpiak ve.” Hi bia hi zultu pakhat nih Jesuh sinah a hal mi a si i pakhat cio kan ca zongah sullam a ngei tukmi bia a si ve. Khrihfa kan si bangin kan rak ngakchiat lio tein thla a cam mi lawng te kan si ko men hna lai. Catholic Khrihfa hna nih cun “Vancung aum kan Pa, Bawinu Mary sin vancungmi thawngthanh thlacamnak, Thumkomh Pathian sin thangṭhatnak” tibantuk hna kha cu aho paoh nih thiam mi a si ko.  Hi thlacamnak hna a tling tukmi thlacamnak an si bangin kan nun chung vialte kan caah sullam an ngei zungzal ko lai. 

Ngakchia pakhat nih amah a si khawh ning tein le a ruah khawh ning tein thla a cam ko men lai. A hun upat deuh tikah a thlacam ning zong aa thleng kho mi a si. Zeicah kan ti a si ahcun a ruahning le aa hmuh ning, thil a ton ning hna a ngakchiat lio caan bang khan si ti loin a theih hngalh ning aa thleidan tuk cang caah a si. Hihi cu minung pakhat sining in duh mi le aa thleng thiammi thlacamnak a si. Sianginn a kai lio mi pakhat nih fimthiamnak caah thla a cam men lai, ralkap pakhat nih himnak caah thla a cam men lai, chaw a dawr mi nih a miak a hmuh nak hnga ding caah thla a cam men lai. Mah sining he pehtlai in ahopaoh nih thla cam cio a si ko. 

Sihmanhsehlaw, nihin kan thieh mi cathiang chungin Jesuh nih a cawnpiakmi hna thlacamnak hi cu aho ca paoh ah a tlam a tling mi thlacamnak a si ko. Taksa caah siseh, thlarau caah siseh, a herhmi thlacam ning vialte Bawipa nih tling tein a kan cawnpiak. Jesuh Pathian hrimhrim nih a kan cawnpiak mi hi thlacamnak te hi nifatin kan cam zungzal ding a si. Cun kan herh taktak mi kan i theih i kan hal thiamnak hnga ding ca zongah Jesuh sinah: “Bawipa, thlacam ning ka cawnpiak ve” tiin kan hal ve ding zong a si.